تۇركيا پرەزيدەنتى قازاقستاندىقتاردى قازاق حاندىعىنىڭ 550 جىلدىعىمەن قۇتتىقتادى
«ءۇش جىلدان كەيىن مەن بابالارىمىزدىڭ جەرىنە، ءبىزدىڭ اتالارىمىزدىڭ وتانىنا تۇركيا پرەزيدەنتى رەتىندە ساپارلاپ كەلدىم. بۇل ساپار ارقىلى ەرەكشە قۋانىشقا بولەنىپ وتىرمىن» ، - دەدى رەدجەپ تايىپ ەردوعان بۇگىن اقوردادا جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ەكىنشى وتىرىسىنان كەيىنگى بىرلەسكەن مالىمدەمەدە.
مۇنىمەن قوسا تۇركيا باسشىسى قازاقستانعا ساپارى ەرەكشە ماڭىزعا يە ەكەنىن ايتا كەلە، وسى ورايدا ءوز ساپارىنىڭ بيىل قازاق حاندىعىنىڭ 550 جىلدىعىمەن ساباقتاسىپ وتىرعاندىعىن اتاپ ءوتتى.
«وسى تۇرعىدا مەن باۋىرلاس جاقىن قازاقستان حالقىن بيىلعى مەرەيتويلى جىلمەن قۇتتىقتاعىم كەلەدى»، - دەدى ول.
رەدجەپ تايىپ ەردوعان ەكى ەل ءوزارا قاتىناستاردى ستراتەگيالىق دەڭگەيگە دەيىن جەتكىزگەنىن، ال 2012 -جىلى جوعارى دەڭگەيدەگى ستراتەگيالىق ىنتىماقتاستىق كەڭەسى تاعايىندالىپ، بۇل ءوز كەزەگىندە ەكىجاقتى بايلانىستاردى دامىتا تۇسكەندىگىن قاداپ ايتتى.
اۆتور: رۋسلان عابباسوۆ
