سوت ۇكىمى: ەرلان ءبىلالعا 52 ميلليون تەڭگە ايىپپۇل سالىندى

الماتى. قازاقپارات - الماتىدا مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بۇرىنعى ديرەكتورى ەرلان ءبىلالعا قاتىستى سوت ۇكىمى شىقتى، دەپ حابارلايدى قازاقپارات ءتىلشىسى.

سۋديا قۋانىش ءارىپوۆ تەاتر ديرەكتورىن ايىپتى دەپ تاۋىپ، پارا كولەمىنەن 35 ەسە جوعارى كولەمدە ايىپپۇل سالدى. ەندى ەرلان ءبىلال 1 اي ىشىندە مەملەكەتكە 1,5 ميلليون تەڭگەنى 52,2 ميلليون تەڭگە ەتىپ قايتارۋى ءتيىس.

سونىمەن قاتار، سۋديا پرەزيدەنت اتىنا ەرلان ءبىلالدى مەملەكەتتىك ماراپاتتارىنان ايىرۋ تۋرالى ءوتىنىم جىبەردى.

ونىڭ الدىندا پروكۋرور سوتتالۋشىدان العان پاراسىنان 60 ەسە كوپ ايىپپۇل، ياعني 90 ميلليون تەڭگە ءوندىرىپ الۋدى سۇراعان بولاتىن.

ەرلان ءبىلالدىڭ ءوزى سوتقا ۇكىم شىعاراردا ونىڭ دەنساۋلىعىنىڭ ناشارلىعىن جانە كىناسىن تولىق مويىنداعانىن ەسكەرۋدى، مۇمكىن بولسا، باس بوستاندىعىنان ايىرماي، ايىپپۇل كولەمىن ازايتۋدى سۇرادى.

«سەزام» قوعامدىق قايىرىمدىلىق قورىنىڭ پرەزيدەنتى قايرات بايانوۆتىڭ ادۆوكاتى قورعاۋىنداعى ازاماتتىڭ ماتەريالدىق شىعىنعا قاتىستى ەشقانداي شاعىمى جوق ەكەنىن، ويتكەنى بارلىق قاراجات وتەلگەنىن جەتكىزدى.

ايتا كەتەيىك، تەرگەۋشىلەردىڭ مالىمەتى بويىنشا، ەرلان ءبىلال «سەزام» تەاترىنىڭ جەتەكشىسى قايرات بايانوۆ 1,5 ميلليون تەڭگە پارا تالاپ ەتكەن. ول 2018 -جىلدىڭ 2 - قاڭتارىندا 600 مىڭ تەڭگە العان، 4 - قاڭتاردا پارانىڭ قالعان بولىگىن 900 مىڭ تەڭگەنى الىپ جاتقانىندا ۇستالدى.

اۆتور: گۇلميرا عوسمانالي