وليمپيادادا قازاقستان جەڭىپ العان 52 مەدالدىڭ قانشاسى قىزدارىمىزدىڭ ەنشىسىندە؟
اسىرەسە، قىزىن قۇدايىنداي سىيلاپ، قۇرمەتتەيتىن قازاق قوعامىندا قىز بالانى «قىزىم - قىزعالداعىم، ۇلىم - ىزگى ارمانىم» دەپ ماپەلەپ، اۋىر جۇمىسقا سالماي ايالاپ وسىرگەن.
الايدا، بۇگىنگى تاڭدا بۇل كوزقاراس مۇلدە وزگەرىپ كەتتى. ءتىپتى كەيبىر سپورت تۇرلەرىنەن جىگىتتەردەن ەمەس، قىزداردان ءۇمىت كۇتەتىن دەڭگەيگە جەتتىك. مىسالى، بيىل كوپتەگەن قازاق جانكۇيەرلەرى جەڭىل اتلەت ارۋىمىز ولگا رىپاكوۆاعا زور ءۇمىت ارتىپ وتىر. ال وسى سپورت تۇرىنەن «جىگىتتەردىڭ قايسىسى جۇلدەگە لايىق» دەپ سۇراي قالساڭىز ويلانىپ بارىپ جاۋاپ بەرەرى ءسوزسىز.
قازىر ەلىمىزدە سپورتپەن اينالىسىپ، حالىقارالىق ارەنالاردا كوك تۋىمىزدى جەلبىرەتىپ، ءانۇرانىمىزدى اسپانداتا شىرقاتىپ جۇرگەن ارۋلارىمىز جەتكىلىكتى. وعان انا-مىنا جارىستار ەمەس، سپورت جارىسىنىڭ تورەسى، ءتورت جىلدا ءبىر الاۋى تۇتاناتىن وليمپيادا ويىندارىنداعى جەتىستىكتەرىمىز دالەل.
قىزدارىمىز سپورتتىڭ اۋىر اتلەتيكا، بوكس، كۇرەس سياقتى فيزيكالىق دەنە كۇشى مەن پسيحولوگيالىق توزىمدىلىكتى تالاپ ەتەتىن تۇرلەرىنەن جارىستاردا جىگىتتەردەن كەم ونەر كورسەتپەيدى. مۇنداي اۋىر سپورت تۇرىنە كوپ جاعدايدا جىگىتتىڭ جىگىتى عانا توزە الادى. جالپى قىزدارىمىز جىگىتتەر اينالىساتىن سپورتتىڭ بارلىق تۇرىمەن اينالىسا الاتىنىن دالەلدەپ ءجۇر.
تاۋەلسىزدىك العاننان بەرى وتانداستارىمىز قاتىسقان 5 جازعى وليمپيادانىڭ تاريحىنا ۇڭىلسەڭىز، جەرلەستەرىمىز قازاقستان قورجىنىنا جالپى 52 مەدال سالعان ەكەن. بۇل جۇلدەنىڭ بارلىعى تەك جىگىتتەرىمىزگە عانا تيەسىلى ەمەس. ونىڭ 11 ءى ارۋلارىمىزدىڭ ەنشىسىندە. وسى 11 مەدالدىڭ 5 ەۋى التىن، 2 ءى كۇمىس، 4 ءى قولا مەدال.
التىن مەدالدىڭ يەگەرى اتانعان ارۋلارىمىز:
ولگا شيشيگينا (جەڭىل اتلەتيكا) - سيدنەي وليمپياداسى (2000)
ولگا رىپاكوۆا (جەڭىل اتلەتيكا) - لوندون وليمپياداسى (2012)
ءزۇلفيا چينشانلو (اۋىر اتلەتيكا، 53 كەلى) - لوندون وليمپياداسى (2012)
مايا مانەزا (اۋىر اتلەتيكا، 63 كەلى) - لوندون وليمپياداسى (2012)
سۆەتلانا پودوبەدوۆا (اۋىر اتلەتيكا، 75 كەلى) - لوندون وليمپياداسى (2012).
كۇمىس مەدالدىڭ يەگەرى اتانعان ارۋلارىمىز:
يرينا نەكراسوۆا (اۋىر اتلەتيكا، 63 كەلى) - بەيجىڭ وليمپياداسى (2008)
اننا ۆاجەنينا (اۋىر اتلەتيكا، 75 كەلى) - بەيجىڭ وليمپياداسى (2008).
قولا مەدالدىڭ يەگەرى اتانعان ارۋلارىمىز:
ەلەنا شالىگينا (ايەلدەر كۇرەسى، 63 كەلى) - بەيجىڭ وليمپياداسى (2008)
ماريا گرابوۆەتسكايا (اۋىر اتلەتيكا، +75 كەلى) - بەيجىڭ وليمپياداسى (2008)
مارينا ۆولنوۆا (ايەلدەر بوكسى، 75 كەلى) - لوندون وليمپياداسى (2012)
گۇزەل مانيۋروۆا (ايەلدەر كۇرەسى، 72 كەلى) - لوندون وليمپياداسى (2012).
مىنە، قازاقستاندىق قىزداردىڭ وليمپيادا ويىندارىندا ەل قورجىنىنا سالعان جۇلدەلەرى. ال، الەم جانە قۇرلىقتىق بىرىنشىلىكتەردەگى جەتىستىكتەرىمىز بۇدان الدەقايدا كوپ ەكەنى ايتپاساق تا تۇسىنىكتى.
وسى ورايدا ايتا كەتەيىك، الاشتىڭ ەندىگى ارمانى قازاقتىڭ قاراكوز قىزدارى اراسىنان ءبىر وليمپيادا چەمپيونىن كورۋ. بۇيىرتسا، بۇل كۇندەر دە الىس ەمەس دەگەن ۇمىتتەمىز. ەندەشە، بيىلعى ريو وليمپياداسىندا ءبىر قازاق قىزى وليمپيادانى باعىندىرىپ، قازاقتىڭ قىزدارىن كۇللى الەمگە تانىتسىن دەپ تىلەيىك.
اۆتور: كۇنسۇلتان وتارباي