الەم بويىنشا 52,6 ميلليون جالدامالى جۇمىسشىنىڭ تورتتەن ءبىرىن قىز-كەلىنشەكتەر قۇرايدى

استانا. قازاقپارات - حالىقارالىق ەڭبەك ۇيىمىنىڭ سوڭعى دەرەكتەرىنە سۇيەنسەك، الەم بويىنشا 52,6 ميلليون ادام ءۇي قىزمەتشىسى بولىپ جۇمىس ىستەيدى ەكەن.

بۇل تۋرالى بۇگىن استانادا وتكەن ۇلتتىق كونسۋلتاتيۆتىك كەڭەس بارىسىندا ب ۇ ۇ- ايەلدەر ۇيىمىنىڭ ورتالىق ازياداعى كوپتاراپتى ءبولىمنىڭ قازاقستانداعى باعدارلامالار جونىندەگى مامانى گۇلنار سمايىلوۆا ءمالىم ەتتى.

«حالىقارالىق ەڭبەك ۇيىمىنىڭ سوڭعى دەرەكتەرىنە سۇيەنسەك، الەم بويىنشا 52,6 ميلليون ادام ءۇي قىزمەتشىسى بولىپ جۇمىس ىستەيدى. ونىڭ تورتتەن ءبىرى قىز- كەلىنشەكتەردى قۇرايدى. سوندىقتان بۇۇ ايەلدەر ۇيىمى «ەڭبەك جانە كوشى- قون تۋرالى ۇلتتىق زاڭنامالار: قازاقستانداعى ءۇي قىزمەتكەرلەرىنىڭ قۇقىقتارىن ءتيىمدى شەشۋ» جوباسىن قولدايمىز. ناقتى قانداي ماسەلەنى شەشۋ كەرەك دەگەنگە كەلسەك، بىرىنشىدەن زاڭناماعا ءۇي قىزمەتشىلەرىنىڭ، سونىڭ ىشىندە ايەلدەردىڭ قۇقىعىن قورعايتىن نورمالاردى ەنگىزۋ كەرەك»، - دەيدى مامان.

ونىڭ ايتۋىنشا، كۇن تارتىبىندەگى تاعى ءبىر وزەكتى ماسەلە - جۇمىس بەرەتىن جەكەمەنشىك اگەنتتىكتەردىڭ جاۋاپكەرشىلىگىن كۇشەيتۋ كەرەك.

«ەكىنشىدەن، ادامدارعا جۇمىس تاۋىپ بەرەتىن جەكەمەنشىك اگەنتتىكتەردىڭ جاۋاپكەرشىلىگىن كۇشەيتۋ كەرەك. سەبەبى قازىر قازاقستاندا «ەڭبەك تۋرالى» زاڭنىڭ اراسىندا جەكەمەنشىك جۇمىس بەرۋ اگەنتتىكتەرىنىڭ قىزمەتى تۋرالى قىسقاشا جازىلعان، الايدا ولاردىڭ جاۋاپكەرشىلىگى جازىلماعان. سوندىقتان وسى ەكى ماسەلەنى كۇن تارتىبىنە شىعارىپ وتىرمىز»، - دەيدى گ. سمايىلوۆا.

اۆتور: كەنجەكەي توقتامۇرات قىزى