وزبەكستاندا بيىل 50 جىل بۇرىن بولعان قاتتى اياز قايتالاندى
وزبەكستان گيدرومەتەورولوگيالىق قىزمەتىنىڭ مالىمەتىنشە، بيىل وزبەكستاندىقتار قاڭتاردا جەرگىلىكتى كليمات ءۇشىن اسا سۋىق قىستى وتكەرگەن. ەكىنشى مىڭجىلدىقتىڭ باسىنان بەرى 2008 -جىلدىڭ قاڭتارى عانا قازىرگى قاڭتاردان ءسال سۋىق بولعان.
اۋا تەمپەراتۋراسى ەلدىڭ كەيبىر اۋدانىندا وتە قاتتى تومەندەگەن. اسىرەسە، تاشكەنت قالاسىندا 2008 -جىلداعىدان دا، ءتىپتى سوڭعى جارتى عاسىرداعى ەڭ تومەن دەڭگەيگە جەتكەن.
«ال، تاشكەنت، جيزاق وبلىستارى مەن رەسپۋبليكانىڭ وڭتۇستىگىندەگى جەكەلەگەن ستانسالاردى باقىلاۋ ناتيجەلەرى بويىنشا وسى جىلدىڭ قاڭتار ايىندا مەتەورولوگيالىق باقىلاۋدىڭ بارلىق جىلىندا ەڭ تومەنگى اۋا تەمپەراتۋراسىنىڭ ءابسوليۋتتى رەكوردى تىركەلدى»، - دەپ حابارلايدى وزگيدرومەت.
سينوپتيكتەر قاڭتاردىڭ سوڭعى كۇندەرىندە ايازدىڭ بىرتىندەپ السىرەگەنىن ايتتى. بۇل ءۇردىس اقپان ايىنىڭ باسىندا دا جالعاسادى. رەسپۋبليكا اۋماعىنا جەرورتا تەڭىزى اۋداندارىنان ىلعالدى جانە سالىستىرمالى تۇردە جىلى اۋا ىعىسادى.
بۇعان دەيىن حابارلاعانىمىزداي، وزبەكستاندا سۋىققا بايلانىستى وقۋشىلاردىڭ قىسقى دەمالىسى ۇزارتىلدى.
تاشكەنت قالاسىندا 13-قاڭتار كۇنى -19,8 گرادۋس سۋىق تىركەلدى. بۇل - وزبەكستان استاناسىنداعى كەيىنگى جارتى عاسىرداعى ەڭ سۋىق تەمپەراتۋرا.