قىتايمەن شەكارالاس كەدەن بەكەتىنىڭ باسشىلارى پروكۋرورعا 50 مىڭ دوللار پارا بەرگەن

بۇل جايىندا ۆەدومستۆو ءوزىنىڭ Youtube كانالىندا ءمالىم ەتتى.
«ناتيجەسىندە مەملەكەتكە 165 ميلليارد تەڭگەگە زالال كەلتىرگەن كەدەندىك تولەمدەردەن جالتارۋ جانە تاۋارلاردى جالعان دەكلاراتسيالاۋ فاكتىلەرى انىقتالدى. تەك قىتايمەن شەكارالاس كەدەن بەكەتتەرىندە تاۋارلاردى جالعان دەكلاراتسيالاۋدىڭ 367 فاكتىسى ورىن العان. كاسىپكەرلەردىڭ سالىقتان جالتارۋى ءۇشىن، ۋاكىلەتتى ەكونوميكالىق وپەراتورلار سوڭعى ەكى جىلدا 221 ميلليارد تەڭگەگە جالعان سچەت- فاكتۋرا جاساعان. تەكسەرۋدىڭ تەك ءبىر ايىندا جالپى قۇنى 800 ميلليون تەڭگەنى قۇرايتىن كونتراباندانىڭ 16 فاكتىسى انىقتالدى. مىسالى، «GROUP OF THE COMPANIES TDA» كومپانياسى 287 ميلليون تەڭگەنىڭ تاۋارىن شەكارادان زاڭسىز وتكىزگەن. اتالمىش كومپانيانىڭ ديرەكتورى قاماۋعا الىندى» دەلىنگەن ۆيدەودا.
سونداي-اق، كەدەن سالاسىنداعى جۇمىسكەرلەر ءوز قىزمەتىن لايىقتى ورىنداماعان.
اتاپ ايتقاندا، 27-قاڭتاردا «نۇر جولى» كەدەن بەكەتىنىڭ مامانى موشكانوۆ، «بەرەكەت لوگيستيك» كومپانياسىنا تيەسىلى دەكلاراتسيالانباعان تاۋاردىڭ سالماعىن زاڭسىز ازايتىپ، ونى 337 ك گ دەپ كورسەتكەن. الايدا، پروكۋرورلار جۇكتى قايتا تەكسەرگەن كەزدە، دەكلاراتسيالانباعان تاۋاردىڭ سالماعى 22 توننا ەكەندىگىن انىقتاعان. ول تاۋارلاردىڭ قۇنى 127 ميلليون تەڭگەنى قۇراعان.
«بۇدان بولەك، اقپاراتتىق جۇيەلەردە مالىمەتتى زاڭسىز وزگەرتۋ سالدارىنان 9 يمپورتتاۋشى بيۋدجەتكە 143 ميلليون تەڭگە شىعىن كەلتىرگەن. بۇل ىسكە الماتى مەملەكەتتىك كىرىستەر دەپارتامەنتى قىزمەتكەرلەرىنىڭ قاتىسى بار. «نۇر جولى» كەدەن بەكەتىنىڭ باسشىسى مەن ونىڭ ورىنباسارى پروكۋرورعا 50 مىڭ ا ق ش دوللارى كولەمىندە، ال «Cargo Management» وپەراتورىنىڭ وكىلى 30 مىڭ ا ق ش دوللارى كولەمىندە پارا بەرگەن. الايدا پروكۋراتۋرا قىزمەتكەرى ولاردىڭ زاڭسىز ارەكەتىنە توسقاۋىل قويىپ، سىبايلاس جەمقورلىققا قارسى قىزمەتىمەن بىرلەسىپ ارنايى شارالار جۇرگىزۋ كەزىندە پارا بەرۋشىلەردىڭ ارەكەتىن اشكەرەلەگەن. جوعارىدا اتالعان فاكتىلەر بويىنشا سوتقا دەيىنگى تەرگەپ- تەكسەرۋ جۇرگىزىلۋدە. كەدەندىك رەتتەۋ سالاسىنداعى پروبلەمالاردى جويۋ ءۇشىن ۇكىمەتكە پروكۋرورلىق قاداعالاۋ اكتىسى ەنگىزىلدى» دەلىنگەن حابارلامادا.