ەلوردادا وتەتىن بالەت ارتىستەرى اراسىنداعى بايقاۋدىڭ جۇلدە قورى - 50 مىڭ دوللار
17 - قىركۇيەك كۇنى جەڭىمپازى انىقتالاتىن بايقاۋدا باس جۇلدەگەر 10 مىڭ دوللار الادى. ال ايەلدەر مەن ەرلەر اراسىندا ءبىرىنشى ورىن العاندارعا 7 مىڭ، ەكىنشى ورىن العاندارعا 5 مىڭ، ءۇشىنشى ورىن العاندارعا 3 مىڭ دوللار سىياقى بەرىلەدى. ءتورتىنشى ورىنعا تۇراقتاعان ديپلومانتتارعا ءبىر مىڭ دوللار سىياقى بار. مۇنان بولەك، رامازان باپوۆ اتىنداعى، «ۇكىلى ءۇمىت» ، ۇزدىك دۋەت، زاماناۋي حورەوگرافيانى ۇزدىك ورىنداۋلار اتالىمىندا دا 1 مىڭ دوللاردان سىياقى ۇلەستىرىلەدى.
جۇلدەلى ورىندار ءۇشىن ب ا ق سىناۋعا ەلوردامىزعا ءوزىمىزدىڭ ارتىستەردەن بولەك رەسەي، ۋكراينا، ازەربايجان، قىرعىزستان جانە جاپونيادان ونەر مايتالماندارى كەلىپ وتىر. جەرەبە قورىتىندىسىنا سايكەس، بايقاۋدىڭ العاشقى اينالىمى اياسىندا 12 -قىركۇيەك كۇنى بىشكەكتەن كەلگەن 19 جاستاعى الينا مامبەتاليەۆا ساحناعا ءبىرىنشى بولىپ شىعادى.
«ءبىرىنشى ءنومىردىڭ ماعان تۇسەرىن مۇلدەم كۇتپەگەن ەدىم. ءنومىردى الىپ شىققان ساتتە قايتا سالا سالىپ، اۋىستىرعىم دا كەلدى. بارلىعى دا جاقسى بولادى دەپ ۇمىتتەنەمىن، تىرىسامىن ەندى. بايقاۋ جايىندا عالامتوردان ءبىلدىم. جالپى، بۇل بايقاۋ جايىندا تانىستارىمنان ەستىپ، قاتىسقىم كەلىپ جۇرگەنمىن» ، - دەدى ول.
قازىلار القاسىنىڭ ءتورايىمى، استانادا تاياۋدا عانا اشىلعان حورەوگرافيا اكادەمياسىنىڭ رەكتورى التىناي اسىلمۇراتوۆ ءدال قازىرگى ۋاقىتتا بايقاۋعا قاتىسۋشىلاردىڭ دەڭگەيىنە باعا بەرە المايتىندىعىن اشىق ايتتى. سەبەبى كونكۋرسانتتاردىڭ ساحناداعى ونەرى يتاليا، قىتاي، ۆەنگريا، سلوۆاكيا جانە ەستونيادان كەلگەن تورەشىلەردىڭ ەشقايسىسى دا تاماشالاعان جوق.
«مەن «استانا وپەرانىڭ» ءۇش بالاسىمەن جانە «استانا بالەتتىڭ» ءۇش قىزىمەن تانىسپىن. ال قالعاندارىن بىلمەيمىن. بايقاۋدىڭ بارلىق قىزىعى دا وسىندا» ، - دەدى ول.
ا. اسىلمۇراتوۆ تورەشىلەردىڭ بارلىق مۇشەلەرى وتە تانىمال ءارى كاسىپقويلار الەمىندە ەسىمدەرى بەلگىلى ماماندار ەكەندىكتەرىن، ولاردى استاناعا تەك تورەشى بولۋ ءۇشىن عانا شاقىرماعاندىعىن ايتتى.
«ولاردى شاقىرۋدا ىشكى ەسەبىم بار ەكەندىگىن دە جاسىرمايمىن. ولاردى ءبىزدىڭ بايقاۋعا قاتىسۋشىلارعا تورەلىك جاساۋمەن قاتار تەاترىمىزدى كورۋ ءۇشىن دە شاقىردىم. ولاردىڭ ىشىندە لۋيدجي بونينودان باسقا ەشقايسىسى استانادا بولعان جوق جانە تەاترىمىزدى كورمەگەن. ولار كورگەن سوڭ مۇمكىن كەلەشەكتە شىعارماشىلىق تۇرعىدا ۋاعدالاستىققا قول جەتكىزىپ قالارمىز. ماسەلەن، بەيجىڭ ءبي اكادەمياسىنىڭ پروفەسسورى سياو سۋحۋا كەلدى. ال بىزدە تاياۋدا عانا حورەوگرافيا اكادەمياسى اشىلدى. بىزدەرگە بايلانىس ورناتۋ قىزىقتى بولار ەدى. ءبىزدىڭ ارتىستەرىمىز، بالەتمەيستەرىمىز، حورەگرافتارىمىز تەك قازاقستاندا عانا دامىماي الەمنىڭ تۇپكىر- تۇپكىرىنە بارىپ، تاجىريبە جيناعانىن قالايمىن» ، - دەدى ول.
