بيىل پاۆلودار وبلىسىنا قونىستاناتىن شەتەلدىك قازاقتاردىڭ سانى 500 گە جەتەدى
بۇل تۋرالى وبلىستىق اكىمدىكتە وتكەن الەۋمەتتىك جانە مادەني دامۋ ماسەلەلەرى تۋرالى وڭىرلىك ءماسليحات كوميسسياسىنىڭ تۇراقتى وتىرىسىندا ايتىلدى.
«جىل باسىنان بەرى موڭعوليا، قىتاي، وزبەكستان جانە رەسەي ەلدەرىنەن وڭىرگە 250 ادام كەلگەن. ولاردىڭ ىشىندە كۆوتا الماعان ەتنيكالىق قازاقتار بار. سوندىقتان بارلىعىن سايكەستەندىرۋ كەرەك. ءبىزدىڭ وڭىرگە بولىنگەن 250 كۆوتانى تولىعىمەن ورىندادىق. سوندىقتان ەڭبەك جانە الەۋمەتتىك قورعاۋ مينيسترلىگىنە كۆوتانى تاعى 250 ادامعا نەمەسە 63 وتباسىنا ارتتىرۋ تۋرالى وتىنىشپەن جۇگىندىك»، - دەيدى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى حەلۋا قاشكەنوۆا.
جىلدىڭ سوڭىنا دەيىن تاريحي وتانىنا ورالعان قانداستاردىڭ سانى 500 ادامعا جەتەدى. حەلۋا قاشكەنوۆانىڭ ايتۋىنشا، كۆوتانىڭ ارقاسىندا كوشۋگە سۋبسيديا جانە جىل بويى باسپانا جالداپ تۇرۋعا جاردەماقى الۋ مۇمكىندىگى ۇسىنىلادى. ەتنيكالىق قازاقتار تۋىستارىمەن قاۋىشۋ ءۇشىن كەلەدى جانە باسىم بولىگى اقسۋ، ەكىباستۇز اۋىلدىق ايماقتارى مەن ۋسپەن، ماي، پاۆلودار جانە ەرتىس اۋداندارىن تاڭدايدى. بۇدان باسقا، بيىلعى جىلى وبلىستىڭ ءۇش قالاسى مەن اۋداندارىنا قازاقستاننىڭ جۇمىس كۇشى مول ايماقتارىنان 2175 ادامدى نەمەسە 548 وتباسىن قابىلداۋ جوسپارلانىپ وتىر.
ەسكە سالا كەتەيىك، ەتنيكالىق قازاقتاردى پاۆلودار وبلىسىنا كوشىرۋ ءىسى 2009 -جىلى قولعا الىنعان بولاتىن. قىتايدان قونىس اۋدارعان ورالمان ادال حاميتحان تراكتورمەن پاۆلودار وبلىسىنا جەتۋ ءۇشىن ءبىر اپتانىڭ ىشىندە 1,5 مىڭ شاقىرىمدى ارتقا تاستاپ كەلگەن.
