بىلىكتىلىكتى ارتتىرۋ كۋرستارىنان 500 مىڭ پەداگوگ وتەدى

نۇر-سۇلتان. قازاقپارات - ق ر ءبىلىم جانە عىلىم ءمينيسترى كۇلاش ءشامشيدينوۆا ءبىلىم بەرۋ ساپاسىن ارتتىرۋعا باعىتتالعان شارالار تۋرالى ايتىپ بەردى، دەپ حابارلايدى قازاقپارات ءتىلشىسى.
None
None

«ەڭ باستى ماسەلەلەردىڭ ءبىرى - ول ءبىلىم ساپاسىن ارتتىرۋ. ال ءبىلىم بەرۋ ساپاسى ءبىرىنشى كەزەكتە پەداگوگتاردى دايارلاۋ ساپاسىنا بايلانىستى. سوندىقتان الداعى 2 جىلدا 500 مىڭنان استام مەكتەپ مۇعالىمدەرى، كوللەدج جانە ج و و وقىتۋشىلارى بىلىكتىلىك كۋرستارىنان وتەدى»، - دەدى مينيستر ەلوردا اكىمدىگىندە كوپبالالى انالارمەن وتكەن كەزدەسۋدە.

ونىڭ سوزىنە قاراعاندا، بيىل مەكتەپ پسيحولوگتارى مەن سىنىپ جەتەكشىلەرى بىلىكتىلىكتى ارتتىرۋ شارالارىمەن قامتىلادى. سەبەبى پسيحولوگ كومەگى بالالار مەن اتا-انالارعا، سونداي-اق مۇعالىمدەرگە دە قاجەت بولىپ وتىر.

بۇدان بولەك، ۆەدومستۆو باسشىسى سالا ماماندارىنىڭ اراسىندا كىمدەردىڭ ەڭبەكاقىسى وسەتىنىن ايتتى.

«نەگىزىنەن، ەڭبەكاقىنى ارتتىرۋ كومەكشى پەرسونالعا ارنالماق، ياعني بالاباقشا تاربيەشىلەرىنىڭ كومەكشىلەرى، عيمارات پەن اۋلانى جيناپ تازالاۋشىلار، كۇزەتشىلەر قامتىلادى. كەلەسى نەگىزگى پەرسونال - ولار كوللەدج وقىتۋشىلارى، پسيحولوگتار، مەكتەپتەگى الەۋمەتتىك پەداگوگتار، بالاباقشا تاربيەشىلەرى. وسى ارقىلى بيۋدجەت سالاسىنداعى جالاقىسى تومەن جۇمىسشىلاردىڭ ەڭبەكاقىسىن وسىرۋگە بولىنگەن قارجىنىڭ 70 پايىزدان استامى ءبىلىم بەرۋ سالاسىنا باعىتتالادى»، - دەدى ك. ءشامشيدينوۆا.

بۇدان بۇرىن حابارلانعانداي، بۇگىن ەوردا اكىمدىگىندە ق ر پرەمەر-ءمينيسترىنىڭ ورىنباسارى گۇلشارا ءابدىقالىقوۆا ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىنىڭ نەگىزگى باعىتتارىن ءتۇسىندىرۋ بويىنشا كوپبالالى انالارمەن كەزدەستى.

سونىمەن قاتار، شاراعا نۇر-سۇلتان قالاسىنىڭ اكىمى باقىت سۇلتانوۆ، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ، ءبىلىم جانە عىلىم ءمينيسترى كۇلاش ءشامشيدينوۆا، دەنساۋلىق ساقتاۋ ءمينيسترى ەلجان ءبىرتانوۆ قاتىستى.

سوڭعى جاڭالىقتار