تۇركىستاننان ەلدىڭ سولتۇستىگىنە 500 دەن استام وتباسى قونىستاندى
تۇركىستان. قازاقپارات - تۇركىستان وبلىسىنان سولتۇستىك وڭىرلەرىنە سوڭعى ءتورت جىلدا 500 دەن استام وتباسى قونىستانعان، دەپ حابارلايدى قازاقپارات ءتىلشىسى.
ايماقتا تۇراتىن 30 دان استام وتباسى پاۆلودار مەن سولتۇستىك قازاقستان وبلىستارىنا قونىس اۋداردى.
سولتۇستىك وڭىرىندەگى جۇمىسسىزدىق دەڭگەيىن تومەندەتۋ ماقساتىندا ۇيىمداستىرىلعان شاراعا تۇركىستاندىقتار بەلسەندىلىك تانىتۋدا. وڭتۇستىكتە ەكى قولعا ءبىر جۇمىس تاپپاعاندار ءوز ەرىكتەرىمەن سولتۇستىككە قونىس اۋدارىپ، ونداعى بيلىكتىڭ قولداۋلارىن سەزىنۋدە.
سالا ماماندارىنىڭ سوزىنشە، ول جاقتا تۇرعىندارعا مال، ەگىن شارۋاشىلىعىمەن اينالىسۋىنا تولىق جاعدايلار جاسالماق. سولتۇستىك قازاقستان وبلىسىنىڭ اكىمدىگى مەن كاسىپكەرلەرى دە بۇل ازاماتتاردى جۇمىسپەن قامتيتىن بولادى.