ۇلتتىق بانك 500 تەڭگەلىك «قازاق ۆالسى» جاڭا ەسكەرتكىش مونەتالارىن شىعاردى
«قازاق ۆالسى» مونەتاسى ۇلتتىق مادەنيەتىمىزدىڭ باي مۇراسىن تانىمال ەتۋگە ارنالعان جانە «قازاقستاننىڭ بەينەلەۋ ونەرى» اتتى جاڭا مونەتالار سەرياسىنىڭ العاشقىسى بولىپ تابىلادى، دەپ حابارلايدى قازاقپارات ۇلتتىق بانككە سىلتەمە جاساپ.
مونەتانىڭ ءپىشىنى تىك بۇرىشتى. ونىڭ اۆەرسىندە ورتالىق بولىگىندە ويۋ-ورنەك اياسىندا مەملەكەتتىك تىلدەگى «قازاقستان رەسپۋبليكاسى» جانە ورىس تىلىندەگى «رەسپۋبليكا كازاحستان» دەگەن جازبانىڭ قورشاۋىندا قازاقستان رەسپۋبليكاسىنىڭ ەلتاڭباسى ورنالاسقان. تومەنگى بولىگىندە مونەتانىڭ نومينالىن بىلدىرەتىن «500 تەڭگە» دەگەن جازبا، سوعىلعان جىلىن بىلدىرەتىن «2016» دەگەن سان جانە مونەتا دايىندالعان مەتالدى، ونىڭ سىناماسىن جانە ماسساسىن بىلدىرەتىن «Ag 925 31,1 g» دەگەن جازۋ بار.
جوعارى بولىگىندە مەملەكەتتىك تىلدە «گ. ىسمايىلوۆا»، «قازاق ۆالسى» دەگەن جازبا جانە قازاقستان رەسپۋبليكاسى ۇلتتىق بانكىنىڭ لوگوتيپى ورنالاسقان. مونەتانىڭ رەۆەرسىندە قازاقتىڭ ايگىلى ءبيشىسى، قازاق ك س ر حالىق ءارتىسى شارا جيەنقۇلوۆانىڭ بيلەپ تۇرعان كەيپى سالىنعان سۋرەتشى گۇلفايرۋس ىسمايىلوۆانىڭ «قازاق ءۆالسى» كارتيناسى (ءا. قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۇراجايى) بەينەلەنگەن. ءتۇسى تامپومور تەحنولوگياسى ارقىلى ورىندالعان. قىرى (گۋرتى) تەگىس، بەدەرى مەن جازۋى جوق. مونەتالار 925 سىنامدى كۇمىستەن جاسالعان، ماسساسى - 31,1 گرامم، تىك بۇرىشى 35x45 م م، دايىنداۋ ساپاسى - «proof»، ەڭ كوپ تارالىمى - 3 مىڭ دانا. نومينالى 500 تەڭگەلىك ەسكەرتكىش مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا، سونداي- اق بانك شوتتارىنا ەسەپتەۋ جانە اۋدارىم جاساۋ ءۇشىن قابىلدانۋعا مىندەتتى.
قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى. ەسكەرتكىش مونەتالاردى «قازاقستان رەسپۋبليكاسى ۇلتتىق بانكىنىڭ قازاقستان تەڭگە سارايى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى دايىنداعان. مونەتالاردىڭ ديزاينى قازاقستان رەسپۋبليكاسى پرەزيدەنتىنىڭ 2003 -جىلعى 25 -قىركۇيەكتەگى № 1193 جارلىعىمەن بەكىتىلگەن قازاقستان تەڭگەسى - ۇلتتىق ۆاليۋتا بانكنوتتارى مەن مونەتالارى ديزاينىنىڭ تۇجىرىمداماسىنا سايكەس ازىرلەنگەن.
«Proof» ساپاسىمەن جاسالعان مونەتالار كوللەكسيالىق قۇنى بويىنشا ساتۋعا ارنالعان. ولار كادەسىيلىق وراۋمەن شىعارىلادى جانە قازاقستان رەسپۋبليكاسى ۇلتتىق بانكىنىڭ مەملەكەتتىك، ورىس جانە اعىلشىن تىلدەرىندەگى نومىرلىك ساپا سەرتيفيكاتىمەن جابدىقتالعان. مونەتالاردى قازاقستان رەسپۋبليكاسى ۇلتتىق بانكىنىڭ بارلىق فيليالدارىندا، سونداي- اق ق ر ۇ ب- نىڭ www.nationalbank.kz سايتىنىڭ «مونەتالاردىڭ ينتەرنەت- دۇكەنى» ينتەرنەت - دۇكەنى ارقىلى ساتىپ الۋعا بولادى.
