500 ميللياردەردىڭ ءتىزىمى جاڭاردى: ىشىندە جالعىز قازاقستاندىق بار
استانا. قازاقپارات - 8-قاڭتاردا Bloomberg- ءتىڭ 500 ميللياردەرىنىڭ ءتىزىمى جاڭاردى. ولاردىڭ اراسىندا جالعىز قازاقستاندىق بار، - دەپ حابارلايدى Massaget.kz ءتىلشىسى.
بۇل قانداي رەيتينگ؟
Bloomberg ميللياردەرلەرىنىڭ يندەكسى - الەمدەگى ەڭ باي ادامداردىڭ كۇندەلىكتى رەيتينگى. ول 2012-جىلدان باستاپ جۇزەگە اسىرىلىپ كەلەدى. يندەكس كۇن سايىن نيۋ-يوركتەگى ساۋدا-ساتتىق جابىلعان كەزدە جاڭارتىلىپ وتىرادى.
رەيتينگكە سايكەس 8-قاڭتارداعى اقپارات بويىنشا الەمدەگى ەڭ باي ادام - امەريكالىق ميللياردەر يلون ماسك. ونىڭ بايلىعى 426 ميلليارد دوللارعا باعالانادى. ەكىنشى ورىندا - Amazon يەسى دجەفف بەزوس، ونىڭ بايلىعى 241 ميلليارد دوللار بولادى. ءۇشىنشى ورىندا Facebook جەلىسىنىڭ، Мeta كومپانياسىنىڭ نەگىزىن قالاۋشى مارك سۋكەربەرگ تۇر، ونىڭ اكتيۆتەرى 218 ميلليارد دوللارعا باعالانادى.
الەمدەگى ەڭ باي ون ادامنىڭ قاتارىنا امەريكالىق كاسىپكەر لارري ەلليسون، فرانسۋز ميللياردەرى بەرنارد ارنو، Google- ءدىڭ نەگىزىن قالاۋشىلاردىڭ ءبىرى لارري پەيدج سەرىكتەسى سەرگەي برينمەن بىرگە، Microsoft-تىڭ بۇرىنعى ءىرى اكسيونەرى بيلل گەيتس، Microsoft-تىڭ بۇرىنعى ديرەكتورى ستيۆ بالمەر جانە ينۆەستور ۋوررەن باففەت كىرەدى.
رەيتينگتەگى ەلدەر اراسىندا 190 ميللياردەرى بار ا ق ش كوش باستاپ تۇر. سونداي-اق، رەيتينگتە قىتاي، ءۇندىستان جانە رەسەيدىڭ كوپتەگەن وكىلى بار.
جالعىز قازاقستاندىق كىم؟
رەيتينگتە قازاقستاننان جالعىز ادام بار، ول - ۆلاديمير كيم، ميللياردەر 415-ورىندا تۇر.
Bloomberg رەيتينگى ۆلاديمير كيمنىڭ بايلىعىن 7,11 ميلليارد دوللارعا باعالايدى. بيىل جىل باسىنان بەرى ول 53,8 ميلليون دوللارعا، ال كەيىنگى تاۋلىكتە 15,9 ميلليون دوللارعا ءوستى.
امەريكالىق باسىلىمنىڭ مالىمەتىندە ۆلاديمير كيم قازاقستان مەن قىرعىزستاندا اشىق تاسىلمەن مىس ءوندىرۋ جونىندەگى كومپانيانىڭ، ياعني Kaz Minerals-تىڭ ديرەكتورى جانە بۇرىنعى ءتوراعاسى ەكەنى ايتىلادى.
