500 شاقىرىمدىق بايگەدە قوستاناي تۇقىمدى جىلقىنى تىزگىندەگەن شاباندوزدار جەڭىسكە جەتتى
استانا. قازاقپارات - Allur كومپانياسىنىڭ قوستاناي تۇقىمدى تۇلپارلارىمەن ونەر كورسەتكەن كومانداسى «ۇلى دالا جورىعى» اتتى ەكىنشى حالىقارالىق مارافون-بايگەدە ءبىرىنشى ورىندى يەلەندى.
شاباندوزدار 500 شاقىرىمدىق قاشىقتىقتى 31 ساعات 19 مينۋتتا ەڭسەرىپ، قىرعىز رەسپۋبليكاسى، ۆەنگريا، يران، رەسەي جانە وڭتۇستىك افريكا رەسپۋبليكاسىنان كەلگەن قاتىسۋشىلاردى قوسا العاندا، 19 كوماندانىڭ ىشىنەن ۇزدىك ناتيجە كورسەتتى. مارەگە نەبارى بەس كوماندا عانا جەتە الدى. ەكىنشى ورىندى قىرعىز رەسپۋبليكاسى قۇراماسى، ءۇشىنشى ورىندى ۇلىتاۋ وبلىسىنىڭ كومانداسى يەلەندى.
كوماندانىڭ ەرەكشەلىگى - بارلىق تۇلپارلاردىڭ قوستاناي تۇقىمىنان ىرىكتەلگەنى. قوستاناي جىلقىسى - قازاقستاننىڭ ۇلتتىق گەنوفوندىنا رەسمي تۇردە ەنگەن العاشقى وتاندىق سپورتتىق باعىتتاعى تۇقىمى. ⅩⅩ عاسىردىڭ ورتاسىندا وسىرىلگەن بۇل تۇقىم توزىمدىلىگىمەن، فيزيكالىق قۋاتىمەن جانە ەلىمىزدىڭ قاتال كليماتتىق جاعدايىنا بەيىمدىلىگىمەن ەرەكشەلەنەدى.
بۇل ەرەكشە تۇقىمدى ساقتاۋ مەن دامىتۋ تەك عىلىمي قولداۋدى عانا ەمەس، سونىمەن قاتار بيزنەستىڭ بەلسەندى قاتىسۋىن قاجەت ەتەدى. قازاقستاندىق Allur اۆتوكولىك كومپانياسى اسىل تۇقىمدى جىلقى شارۋاشىلىعىن جۇيەلى تۇردە قولداپ كەلەدى. بۇل جۇمىس سالالىق عىلىمي ينستيتۋتتارمەن جانە قوستاناي وبلىسى اكىمدىگىنىڭ قولداۋىمەن تىعىز ىنتىماقتاستىقتا جۇزەگە اسىرىلۋدا. ءوڭىردىڭ گەنەتيكالىق قورىن ساقتاۋ ىسىندە اكىمدىك تە ماڭىزدى ءرول اتقارىپ وتىر.
«بۇگىندە ءبىز تەك وندىرىستىك قىزمەتپەن شەكتەلمەيتىن ۇلتتىق باستامالاردى قولداي الاتىنىمىزعا ماقتانامىز. ءبىزدىڭ تۇلپارلاردىڭ مارافونعا قاتىسۋى - جاي عانا سپورتتىق جەتىستىك ەمەس، قوستاناي تۇقىمىن ساقتاۋ مەن ونىڭ ۇلتتىق گەنەتيكالىق قور رەتىندەگى ماڭىزىن ارتتىرۋعا قوسىلعان ناقتى ۇلەس. بۇل جۇمىستى ءبىز كورپوراتيۆتىك ميسسيامىزدىڭ ءبىر بولىگى رەتىندە قاراستىرامىز - وتاندىق قۇندىلىقتاردى ساقتاپ، دامىتۋ، ەلىمىزدىڭ تۇراقتى بولاشاعىنا ۇلەس قوسۋ»، - دەدى Allur زاۋىتىنىڭ باس ديرەكتورى سىرىم سەمەيبايەۆ.
كومپانيا تاراپىنان كورسەتىلەتىن قولداۋ تەك مارافوندارعا قاتىسۋمەن شەكتەلمەيدى: تۇراقتى تۇردە جىلقى ۇستاپ-كۇتۋ، جاتتىعۋلار ۇيىمداستىرۋ، سەلەكتسيالىق جۇمىستارعا كومەك كورسەتۋ جانە قوعام نازارىن تۇقىم ماسەلەلەرىنە اۋدارۋ دا قولعا الىنعان. مارافونداعى جەڭىس - بيزنەستىڭ تۇتاس ءبىر سالانىڭ بولاشاعىنا وڭ ىقپال ەتە الاتىنىنىڭ دالەلى.
مامانداردىڭ ايتۋىنشا، جوعارى گەنەتيكالىق جانە مادەني قۇندىلىعىنا قاراماستان، قوستاناي تۇقىمىنىڭ سانى از، جەكە شارۋاشىلىقتاردىڭ قىزىعۋشىلىعى تومەندەۋدە، سونىمەن قاتار تۇقىمعا ءتان ەرەكشە سيپاتتار جويىلىپ كەتۋ قاۋپى بار. مۇنداي جاعدايدا جاۋاپتى بيزنەسپەن ارىپتەستىك - تۇراقتىلىقتىڭ شەشۋشى فاكتورىنا اينالۋدا.
«ۇلى دالا جورىعىنداعى» بۇل تۇلپارلاردىڭ جەڭىسى - سپورتتىق جەتىستىك قانا ەمەس، سونىمەن قاتار قازىرگى زامانعى بيزنەستىڭ ەلدىڭ مادەني جانە بيولوگيالىق مۇراسىن ساقتاۋدا ماڭىزدى ءرول اتقارا الاتىنىن كورسەتەدى.
