بيىل جەتىسۋداعى الاكولدە 5,5 ميلليارد تەڭگەنىڭ قىزمەتى كورسەتىلگەن
مۇنىڭ ىشىندە الاكول كوش باستاپ تۇر - بۇل ايماقتا 5,5 ميلليارد تەڭگەنىڭ قىزمەتى كورسەتىلدى، دەپ حابارلايدى قازاقپارات ءتىلشىسى.
ال قاپشاعاي سۋ قويماسىندا بۇل قارجى كولەمى 750 ميلليون تەڭگەگە جەتسە، بالقاش كولىن تاڭداعاندارعا 32 ميلليون تەڭگەنىڭ قىزمەتى كورسەتىلگەن.
الماتى وبلىستىق تۋريزم باسقارماسىنىڭ باسشىسى جانار الشىمبايەۆانىڭ سوزىنشە، بۇل كورسەتكىش بىلتىرعى جىلمەن سالىستىرعاندا 2 ەسە كوپ. ال بيىلعى شومىلۋ ماۋسىمى كەزىندە الاكول جاعالاۋى مەن بالقاش كولىنە جانە قاپشاعاي سۋ قويماسىنا بارىپ دەمالعانداردىڭ قاتارى 1 ميلليون 400 مىڭ ادامنان اسقان. وسىلايشا، بىلتىرعى جىلمەن سالىستىرعاندا قازاقستاندىق تۋريزمدى تاڭداعاندار سانى 32 پروتسەنتكە كوبەيىپ وتىر. جىل سوڭىنا دەيىن جەتىسۋدىڭ تۋريزم ايماقتارىنا باراتىنداردىڭ قاتارى 2 ميلليونعا جۋىقتاپ، ولارعا كورسەتىلەتىن تۋريستىك قىزمەت كولەمى 10 ميلليارد تەڭگەگە جەتەدى دەگەن بولجام دا بار.
«قازىرگى تاڭدا قازاقستان رەسپۋبليكاسىندا تۋريزمدى دامىتۋ جونىندەگى مەملەكەتتىك باعدارلامانى ازىرلەۋ اياسىندا الاكول كولىندەگى تۋريزمدى دامىتۋ بويىنشا ماستەر- جوسپار دايىنداپ جاتىرمىز. بۇل ۇلكەن قۇجات بولادى. بۇل جەردە ءبىز تۋريزمدى دامىتۋدا كەشەندى شارالاردى قاراستىرىپ وتىرمىز»، - دەدى الماتى وبلىستىق تۋريزم باسقارماسىنىڭ باسشىسى جانار الشىمبايەۆا.
ەستەرىڭىزگە سالا كەتەيىك، پرەزيدەنتتىڭ مامىر ايىنداعى الماتى وبلىسىنا ساپارى بارىسىندا وبلىس باسشىسى اماندىق باتالوۆ الاكول اۋدانىندا كورسەتىلگەن قىزمەت كولەمى 2017 -جىلى 3,5 ميلليارد تەڭگەگە جەتكەنىن ايتقان بولاتىن.
«سوڭعى ءتورت جىلدا وبلىستا تۋريستىك قىزمەت كورسەتۋ كولەمى ەكى ەسە ارتتى. بۇل كورسەتكىش 2014 -جىلى 3,9 ميلليارد تەڭگەنى قۇراسا، 2017 -جىلى 8,3 ميلليارد تەڭگەگە جەتتى. 2018 -جىلى بۇل كورسەتكىشتى 10 ميلليارد تەڭگەگە دەيىن جەتكىزۋدى جوسپارلاپ وتىرمىز. الاكول اۋدانىندا كورسەتىلگەن قىزمەت كولەمى 2017 -جىلى 3,5 ميلليارد تەڭگەگە جەتىپ، 2014 -جىلعى دەڭگەيمەن سالىستىرعاندا 8 ەسە ارتتى»، - دەگەن بولاتىن ءوڭىر باسشىسى.
ايتا كەتۋ كەرەك، ءبىز بۇعان دەيىن حالىقارالىق ساراپشىلار الاكولدىڭ باس جوسپارىن دايىنداپ جاتقانىن حابارلاعان بولاتىنبىز. وسىنىڭ اياسىندا ساراپشىلار الاكولدىڭ ماۋسىمدىق مەرزىمىن ۇزارتۋدى ۇسىندى.
اۆتور: سامال قابىشيەۆا
