پرەزيدەنت تۇرعىن ءۇي ماسەلەسىن شەشۋ ءۇشىن «5-10-20» باعدارلاماسىن ىسكە قوسۋدى تاپسىردى
«ۇشىنشىدەن، ەكونوميكانىڭ ءوسىمى مەن جۇمىسپەن قامتۋدىڭ جانە الەۋمەتتىك قولداۋدىڭ قۋاتتى ستيمۋلى - قولجەتىمدى تۇرعىن ءۇي قۇرىلىسى بولۋى كەرەك. ەلباسى باستاعان «7-20-25» باعدارلاماسى تۇرعىن ءۇي قۇرىلىسى بويىنشا يپوتەكالىق نەسيەلەۋگە ۇلكەن سەرپىن بەردى. كەزەكتە تۇرعان ادامداردى نەسيەلىك تۇرعىن ۇيمەن قامتاماسىز ەتۋ ءۇشىن جاڭا «5-10-20» باعدارلاماسىن ىسكە قوسۋدى تاپسىرامىن»، - دەدى پرەزيدەنت توتەنشە جاعدايدى قامتاماسىز ەتۋ بويىنشا مەملەكەتتىك كوميسسيا وتىرىسىندا.
بۇل تاپسىرمانى ورىنداۋ ءۇشىن مەملەكەت باسشىسى 390 ميلليارد تەڭگە بولىنەتىنىن ءمالىم ەتتى. «بيىل ەلدە رەكوردىق دەڭگەيدەگى - 15 ميلليون شارشى مەتر نەمەسە 150 مىڭ ءۇي مەن پاتەر سالىنادى. ازاماتتارىمىزدىڭ تۇرعىن ءۇي جاعدايىن جاقسارتۋ جۇمىسىن جالعاستىرۋ كەرەك. بۇل - ۇكىمەتتىڭ ستراتەگيالىق باعىتتارىنىڭ ءبىرى»، - دەدى پرەزيدەنت.
اۆتور: ايان بەكەن ۇلى
