اۋستراليادا ايەل بۇرىنعى كۇيەۋىنىڭ تۋىستارىن تۇسكى اسقا شاقىردى: 4 قوناقتىڭ ۇشەۋى قايتىس بولدى

بريسبەن. قازاقپارات - اۋستراليانىڭ وڭتۇستىگىندەگى لەونگاتا قالاسىنىڭ تۇرعىنى ەرين پاتتەرسون 29 - شىلدەدە بۇرىنعى كۇيەۋىنىڭ اتا- اناسىن، ەنەسىنىڭ اپكەسى مەن ونىڭ جۇبايىن وتباسىلىق تۇسكى اسقا شاقىردى، دەپ حابارلايدى قازاقپارات CNN گە سىلتەمە جاساپ.

ەرين قوناقتارعا تۇسكى اسقا ساڭىراۋقۇلاق تاعامىن ۇسىندى. ءبىر اپتا وتپەي قوناقتاردىڭ ۇشەۋى ۋلى ساڭىراۋقۇلاقتان ۋلانۋ بەلگىلەرىمەن قايتىس بولدى. ۆيكتوريا شتاتى پوليتسياسىنىڭ مالىمەتىنشە، 70 جاستاعى گەيل پاتتەرسون مەن ونىڭ 66 جاستاعى اپكەسى حيزەر ۋيلكينسون اۋرۋحانادا قايتىس بولدى. ءبىر كۇننەن كەيىن گەيلدىڭ 70 جاستاعى كۇيەۋى دون كوز جۇمعان. ءتورتىنشى قوناق، حيزەر ۋيلكينسوننىڭ 68 جاستاعى كۇيەۋى يان اۋرۋحانادا جاتىر. ونىڭ جاعدايى اۋىر. حابارلانعانداي، وعان باۋىر ترانسپلانتاتسياسى قاجەت. بۇل لەونگاتا شاعىن قالاسىن ءدۇر سىلكىندىردى.

دۇيسەنبىدە جەرگىلىكتى ب ا ق- پەن سويلەسكەندە 48 جاستاعى ەرين پاتتەرسون قاتتى كۇيزەلگەنىن جانە بولعان جاعدايعا ءالى سەنە المايتىنىن ايتتى. دۇيسەنبىدەگى بريفينگتە ۆيكتوريا پوليتسياسىنىڭ ادام ءولتىرۋ ءبولىمىنىڭ دەتەكتيۆى دين توماس پاتتەرسوننىڭ كۇدىكتى ەكەنىن ايتتى، ويتكەنى تاماقتى ول دايىنداعان جانە ودان اۋىرماعان جالعىز ەرەسەك ادام. ول سونداي- اق ەرين پاتتەرسوننىڭ كۇيەۋى سايمونمەن اجىراسقانىن، ءبىراق ولاردىڭ دوستار سياقتى ارالاسىپ جۇرگەنىن قوسىپ ءوتتى. سول كۇنى تۇسكى اسقا ەرين مەن سايموننىڭ ەكى بالاسى دا وتىردى، ءبىراق ولار باسقا تاماق جەگەن. ولاردان اۋرۋ بەلگىلەرى انىقتالعان جوق.

توماستىڭ ايتۋىنشا، ەرين پاتتەرسوننىڭ قوناقتارىنداعى اۋرۋ بەلگىلەرى ارامقۇلاقتان ۋلانۋ بەلگىلەرىنە ۇقساس. ءساۋىر ايىندا Victoria Health اقشىل ارامقۇلاقتى (Amanita phalloides) «وتە ۋلى» دەپ اتاپ، ونى تاعام رەتىندە پايدالانۋ ءىشتىڭ قاتتى اۋىرۋى، جۇرەك اينۋى، قۇسۋ جانە ءىشتىڭ ءوتۋى سياقتى اۋرۋ بەلگىلەرىن تۋدىراتىنىن ەسكەرتتى. ۋلانۋدىڭ العاشقى بەلگىلەرى ساقتالسا دا، بۇل ساڭىراۋقۇلاقتاردى تۇتىنۋ باۋىردىڭ اۋىر زاقىمدالۋىنا جانە ولىمگە اكەلۋى مۇمكىن.

ەريننىڭ تۇسكى اسقا قانداي ساڭىراۋقۇلاق بەرگەنى ءالى بەلگىسىز. پاتتەرسون تىلشىلەردىڭ قانداي تاعام دايىندادى دەگەن سۇراعىنا جاۋاپ بەرمەي، ۇيىنە كىرىپ كەتتى. پوليتسيادا سەنبى كۇنى ەرين پاتتەرسوننىڭ ۇيىندە ءتىنتۋ جۇرگىزىلىپ، سوت- مەديتسينالىق ساراپتاما ءۇشىن بىرنەشە زات تاركىلەنگەنىن راستادى. ءتارتىپ ساقشىلارى جەرگىلىكتى تۇرعىنداردى جابايى ساڭىراۋقۇلاق جيناۋدان باس تارتۋعا شاقىرادى.