موڭعولياداعى تويدا ءبىر باپكەردىڭ 4 اتى قاتارىنان جۇلدەلى ورىنعا يە بولدى - شەتەلدەگى قازاق باسپا ءسوزى

موڭعولياداعى تويدا ءبىر باپكەردىڭ 4 اتى قاتارىنان جۇلدەلى ورىنعا يە بولدى - «Janadauir.com»

كوشپەندى حالىقتاردىڭ، سونىڭ ىشىندە قازاق حالقىنىڭ - جۇيرىك اتقا دەگەن كوزقاراسى ەرەكشە. ءتىپتى ايماعىمىزدا دا جەتى اتاسىنان بەرى جۇيرىك باپتاپ، قۇس سالاتىن ونەرلى ازاماتتار بار. سولاردىڭ ءبىرى - ۋلاانحۋس سۇمىن تۋماسى، بەلدى كاسىپكەر، ات باپكەرى ساپار بايىن ۇلى. بۇل ازامات وسى جولعى تويعا تاي جارىسىنان باستاپ ايعىر جارىسىنا دەيىن 7 ات قوسىپ، 2 اتى ءبىرىنشى كەلدى. انىعىراق ايتقاندا جۋان ات جانە قۇنان جارىسىنان ءبىرىنشى، تاي جانە بەستى ات جارىسىنان ءۇشىنشى بولىپ كومبەگە جەتكەن، دەپ حابارلايدى موڭعوليالىق «Janadauir.com». سوندا بايگەگە قوسىلعان اتتارىنىڭ ىشىنەن 4 اتى جۇلدەگەر اتانعان.

ساپار بايىن ۇلىنىڭ ەڭ ءبىرىنشى ۇستانىمى - ات باپكەرى جۇيرىك اتتى تاني ءبىلۋ كەرەك، سودان كەيىن باپتاۋدىڭ ماڭىزى ەرەكشە. سەبەبى ات پەن سپورتشىنىڭ بابى بىردەي.

ايتا كەتۋ كەرەك، بۇل جەردە «توي» دەپ وتىرعانى موڭعوليادا 11-شىلدەدەن باستالاتىن ءداستۇرلى «ناادام» مەرەكەسى. اتالعان مەرەكە جىل سايىن ەلدىڭ بارلىق جەرىندە ءداستۇرلى تۇردە ۇيىمداستىرىلادى. مۇندا ات جارىسى، ۇلتتىق كۇرەس جانە ساداق اتۋ ارقىلى تويلانادى.

ات باپكەرى ساپاردىڭ ايتۋىنشا، ونىڭ اتالارى ات باپتاۋدىڭ قىر-سىرىن جەتىك مەڭگەرگەن. ءوزى دە بالا كۇنىنەن اساۋ ۇيرەتىپ، جۇيرىك مىنگەن قىر بالاسى ەكەن. ات باپكەرى قىس بويى 24 جىلقىنى قولعا ۇستايدى. ولار ۇلكەن ءبىر كوماندا بولىپ جىلدىڭ 12 ايىندا ات باپتاۋعا كوڭىل بولەتىن كورىنەدى.

ات باپكەرى ساپار بايىن ۇلىنىڭ الداعى ماقساتى - جىلقى تۇياعىن ساپالاندىرۋ ەكەن.

قازاقستان ارقىلى وتەتىن قىتاي- ەۋروپا پويىزداردىڭ سانى 61 ەسە ءوستى - «حالىق» گازەتى

«قازاقستاننىڭ كوك تىستى كىتابى - قازاقستاننىڭ دامۋى تۋرالى ەسەپتە (2022)» قازاقستان قىتاي- ەۋروپا پويىزدارى ءۇشىن ماڭىزدى توراپ بولىپ سانالاتىن جانە قازاقستان ارقىلى وتەتىن پويىزدار سانى جىلدان جىلعا ارتىپ كەلەدى. 2013 -جىلعى 77-دەن 2020 -جىلى 4800-گە دەيىن جەتىپ، 61 ەسە كوتەرىلگەنى اتالىپ ءوتتى، دەپ حابارلايدى قىتايدىڭ people.cn اقپاراتتىق پورتالى.

2021 -جىلعى جاعداي بويىنشا قىتاي- ەۋروپا پويىزدارىنىڭ %90 دان استامى قازاقستان ارقىلى وتەدى.

قىتايلىق باسىلىمنىڭ دەرەگىنشە، 2021 -جىلى قىتايدىڭ قازاقستانمەن ەكونوميكالىق، ساۋدا جانە تەحنولوگيالىق ىنتىماقتاستىعى جاڭا ەنەرگەتيكا، اۆتوموبيل جاساۋ جانە ينجەنەرلىك ينفراقۇرىلىم قۇرىلىسىندا، سونداي-اق ەلەكتروندىق كوممەرتسيانىڭ تسيفرلىق پلاتفورمالاردى قۇرۋدا جانە ەلەكتروندىق كوممەرتسيا سالاسىنداعى مامانداردى دايارلاۋدا تىڭ دامۋعا جەتتى. سونىمەن قاتار، قىتاي كۇن جانە جەل ەنەرگياسى سياقتى جاڭارتىلاتىن رەسۋرستاردى پايدالانۋ تەحنولوگيالارىن ازىرلەۋدە، پايدالانۋدا جانە باسقارۋدا ايقىن ارتىقشىلىقتارعا يە ەكەن.

«بۇل «ءبىر بەلدەۋ، ءبىر جول» بويىنداعى ەلدەردىڭ ەكونوميكالىق وزگەرىسى جانە ەنەرگيا تاپشىلىعىن شەشۋ مەن جاڭا ەنەرگەتيكالىق تەحنولوگيالاردى قولدانۋ ءۇشىن قۋاتتى قولداۋ كورسەتەدى»، دەپ جازدى «حالىق» گازەتى.

«ءماجىلىستىڭ تورىنەن موڭعوليادا تۋىپ وسكەن ءۇش ازامات ورىن الدى» - «Kaznews»

موڭعوليانىڭ بايان-ولگەي قالاسىندا موڭعوليا قازاقتارىنىڭ IV كىشى قۇرىلتايى وتكەن بولاتىن. سول القالى جيىندا قازاقستان رەسپۋبليكاسى ءماجىلىسىنىڭ دەپۋتاتى نۇرگۇل تاۋ ساحنا تورىنەن ءوزىنىڭ لەبىزىن جولداعان، دەپ حابارلايدى «Kaznews» اقپاراتتىق پورتالى.

اتالعان جينالىستا نۇرگۇل تاۋ ءوزىنىڭ تۋعان جەرىنە كەلىپ وتە تولقىپ تۇرعانىن، ولگەي قالاسىندا تۋىپ-ءوسىپ، 17 جاسىنا دەيىن ءومىر سۇرگەنىن تىلگە تيەك ەتكەن.

ءماجىلىس دەپۋتاتى ازعانتاي عانا قازاقتىڭ ىشىنەن شىعىپ، قازاقستانعا بارىپ وقىپ، ءبىلىم الىپ، سول جەردە قىزمەت اتقارىپ، وسىنداي جەتىستىككە جەتىپ جاتقانىنا شىنىمەن قۋانىشتى ەكەنىن دە جاسىرمايدى.

ول ءبىلىم سالاسىندا 17 جىلداي قىزمەت اتقارعان. سونىمەن قاتار، الماتى قالالىق ءبىلىم باسقارماسىندا ءبولىم باسشىسى بولىپ قىزمەت ەتكەن. سونداي- اق، قازاقستان رەسپۋبليكاسى پرەزيدەنتىنىڭ «بولاشاق» باعدارلاماسىمەن انگليادا ماگيسترلىك وقىپتى. امەريكادا تاعىلىمدامادان وتكەن. نۇرگۇل تاۋ ءبىلىمىن، ەڭبەگىن باعالاپ ءماجىلىس دەپۋتاتى بولۋعا ىقپال ەتكەن «رەسپۋبليكا» پارتياسىنا دا العىسى شەكسىز ەكەنىن ايتادى.

«سونىمەن قاتار، وسى ءماجىلىستىڭ تورىنەن موڭعوليادا تۋىپ وسكەن ءۇش ازامات ورىن الدى. بۇل وتە ۇلكەن جەتىستىك. ءارقاشان ەكى ەلدىڭ ورتاسىندا كوپىر بولۋعا، ەكى ەلدىڭ دوستىعىن نىعايتۋعا جانە دە وسى قازاق اعايىندارىمىزدىڭ قانداي دا ءبىر ماسەلەسىنە قول ۇشىمىزدى بەرۋگە ءارقاشان دايىنبىز»، دەيدى ق ر ءماجىلىسىنىڭ دەپۋتاتى نۇرگۇل تاۋ.

قازاقستاندىق كومپانيا نامانگاندا قۇنى 800 ميلليون دوللار بولاتىن جوبانى جۇزەگە اسىرماق - «ءوز ا»

نامانگان وبلىسىنىڭ اكىمى شاۆكات ابدۋراززوقوۆ قازاقستاننىڭ «ASK group» كومپانياسى باسشىسى مارات تالىپبايەۆتى قابىلدادى، دەپ حابارلايدى «ءوز ا» اقپاراتتىق اگەنتتىگى.

وزبەكستاندىق ب ا ق-تىڭ مالىمەتىنشە، كەزدەسۋدە ءوزارا ىنتىماقتاستىق ماسەلەلەرى تالقىلانىپ، كۇن فوتوەلەكتر ستانتسياسىنىڭ قۇرىلىسى جوباسىن جۇزەگە اسىرۋ بويىنشا ىنتىماقتاستىق تۋرالى مەموراندۋمعا قول قويىلدى. وسىعان وراي، «ASK group» نامانگاندا 2023-2025 -جىلدارى جالپى قۇنى 800 ميلليون دوللار بولاتىن جوبانى جۇزەگە اسىرماق.

قازاقستاندا «I حالىقارالىق اسكەري مۋزىكالىق فەستيۆالى» ءوتتى - «TRT»

ت ر ۇلتتىق قورعانىس مينيسترلىگىنىڭ (ۇ ق م) تۇرىك اسكەري وركەسترى «مەحتەران» قازاقستاندا 7 ەلدىڭ اسكەري وركەسترلەرىمەن كونتسەرت قويدى.

قازاقستان قورعانىس مينيسترلىگى تاراپىنان باس قالانىڭ 25 -جىلدىعىنا ارنالعان «استانا - مادەنيەت كەرۋەنى» اسكەري وركەسترلەرىنىڭ I حالىقارالىق اسكەري مۋزىكالىق فەستيۆالى جابىلۋ كونسەرتىمەن اياقتالدى.

بۇل تۋرالى وسى اپتادا تۇركيا راديو تەلەۆيزيا پورتالى حابارلاعان.

ايتا كەتەيىك، «بارىس ارەنا» مۇز سارايىندا وتكەن فەستيۆالدىڭ جابىلۋ كونسەرتىنە قازاقستان پرەمەر- ءمينيسترى ءاليحان سمايىلوۆ جانە قورعانىس ءمينيسترى رۋسلان جاقسىلىقوۆ قاتىستى.

تۇركيالىق ب ا ق-تىڭ دەرەگىنشە، قازاقستان، تۇركيا، ازەربايجان، وزبەكستان، رەسەي، قىتاي، جاپونيا جانە ءۇندىستاننىڭ اسكەري مۋزىكالىق وركەسترلەرى ساحناعا شىققان كونسەرتتى جەتى مىڭنان استام كورەرمەن تاماشالاعان.

كونسەرتتە ءوز ەلدەرىنە ءتان اسكەري فورما كيگەن وركەسترلەر رەپەرتۋارلارىنداعى اسكەري انۇراندارمەن قاتار ەسترادا جانە دجاز شىعارمالارىن دا ورىنداپ بەردى.

قىرعىز پرەزيدەنتى «ناادام» مەرەكەسىن تاماشالادى - «Kaznews»

11-شىلدەدە قىرعىز رەسپۋبليكاسىنىڭ پرەزيدەنتى سادىر جاپاروۆ پەن ءبىرىنشى حانىم ايگۇل جاپاروۆا موڭعولياعا مەملەكەتتىك ساپارى اياسىندا ۇلانباتىرداعى ۇلتتىق ستاديوندا وتكەن ۇلتتىق مەيرامنىڭ اشىلۋ سالتاناتىنا قۇرمەتتى قوناق رەتىندە قاتىستى، دەپ حابارلايدى موڭعوليانىڭ «Kaznews» اقپاراتتىق پورتالى.

موڭعوليالىق ب ا ق-تىڭ مالىمەتىنشە، موڭعوليا پرەزيدەنتى ۋحنااگين ءحۇرەلسۇح قۇتتىقتاۋ ءسوز سويلەپ، توعىز اق تۋعا تاعزىم ەتىپ، «ناادام» مەرەكەسىنىڭ باستالعانىن رەسمي تۇردە جاريالادى.

ايتا كەتەيىك، «ناادام» جىل سايىن موڭعوليانىڭ بارلىق جەرىندە ءداستۇرلى تۇردە ۇيىمداستىرىلادى. مۇندا ات جارىسى، ۇلتتىق كۇرەس جانە ساداق اتۋ ارقىلى تويلانادى.

يران مەن قازاقستان اراسىندا تۇراقتى كونتەينەرلىك كەمە تاسىمالداۋ جەلىسى ىسكە قوسىلدى - «Parstoday»

يراننىڭ كاسپيان پورتى مەن قازاقستاننىڭ اقتاۋ پورتى اراسىندا تۇراقتى كونتەينەرلىك كەمە تاسىمالداۋ جەلىسى ىسكە قوسىلدى.

يراننىڭ سولتۇستىگىندەگى انزالي ەركىن ايماعى ۇيىمىنىڭ پورت ىستەرى جانە كاسپيي ايماعى بويىنشا ورىنباسارى ەكسپورت پەن كونتەينەرلىك ترانزيتتىڭ دامۋىنا سايكەس كاسپيان جانە اقتاۋ پورتتارى اراسىنداعى تۇراقتى كونتەينەرلىك تاسىمالداۋ جەلىسىنىڭ ىسكە قوسىلۋى تۋرالى ءمالىم ەتتى.

بۇل تۋرالى وسى اپتادا يراندىق «Parstoday» اقپارات اگەنتتىگى حابارلادى.

«Parstoday» اقپارات اگەنتتىگىنىڭ حابارلاۋىنشا، بۇعان دەيىن قىتاي- قازاقستان- يران حالىقارالىق دالىزىنەن جۇكتەردى كوبىرەك تارتۋ، ەكى ەلدىڭ ساۋداگەرلەرى مەن كاسىپكەرلەرىنە پورت قىزمەتتەرىن كورسەتۋگە جۇمىستار باستالعان بولاتىن. سونىمەن قاتار، كاسپي پورتى مەن قازاقستاننىڭ اقتاۋ پورتى اراسىنداعى كونتەينەرلىك تاسىمالداۋ جەلىسىن دامىتۋ سالاسىنداعى ىنتىماقتاستىقتى دامىتۋعا كومەكتەسۋ ماقساتىندا يراننىڭ انزالي ەركىن ايماعى ۇيىمى مەن قازاقستاننىڭ وكتاو پورتى اراسىندا ىنتىماقتاستىق كەلىسىمىنە قول قويىلدى.

اۆتور:

بەيسەن سۇلتان ۇلى