قازاقستان 4 «التىن» الدى دەگەندە جۇرەگىم جارىلا جازدادى - سانجار تاشكەنبايدىڭ اكەسى
جانكۇيەرلەر التىن مەدال يەگەرلەرى سانجار تاشكەنباي مەن نۇربەك ورالبايدى ءسان-سالتاناتىمەن قارسى الدى، دەپ حابارلايدى قازاقپارات ءتىلشىسى.
قارسى الۋ سالتاناتىنا بوكسشىلاردىڭ تۋىستارى، دوستارى جانە سپورت جانكۇيەرلەرى جينالدى. سانجار تاشكەنباي وسى بايراقتى باسەكەدە قولداۋ كورسەتكەن قازاقستاندىقتارعا العىس ءبىلدىردى.
«ءوز ناتيجەمە كوڭىلىم تولادى. جالپى، جارىس قيىن بولدى. ءبارى دە وليمپياداعا بارعىسى كەلەدى. ەندى ونى ۋاقىت كورسەتەدى، مەن بارىمدى سالامىن. بارشا جانكۇيەرگە العىس ايتقىم كەلەدى»، - دەدى بوكسشى ب ا ق وكىلدەرىنىڭ ساۋالىنا جاۋاپ بەرە وتىرىپ.
وسى ورايدا، سانجاردىڭ اكەسى تاكەن شالدىبايەۆ ۇلىنىڭ جەڭىسىنە قاتىستى پىكىر ءبىلدىردى.
«قازاقستان 4 «التىن» الدى دەگەندە جۇرەگىم جارىلىپ كەتە جازدادى. 3 قىز، 3 ۇلىم بار. مەن وتە باقىتتى اداممىن. مىنە، بولاشاق سپورت جۇلدىزدارى ءوسىپ كەلە جاتىر. سەزىم ەرەكشە، تولقىپ تۇرمىن. قازىر جاستارعا بارلىق جاعداي جاسالعان. سونىڭ ارقاسىندا وسىنداي مىقتى جاستار ءوسىپ كەلە جاتىر»، - دەدى چەمپيوننىڭ اكەسى تاكەن شالدىبايەۆ.
ال، كەلەسى چەمپيون نۇربەك ورالباي كەلەر جىلى وتەتىن وليمپيادا ويىندارىنا قاتىسۋ جانە وندا جەڭىسكە جەتۋ ءۇشىن بار كۇش-جىگەرىن سالاتىنىن ايتتى.
«الدا وليمپيادا ويىندارى بار. وعان بار كۇشىمىزدى سالامىز. مەن وتكەن ازيا ويىندارىندا يوردانيالىق سپورتشىدان ۇتىلىپ، 3-ورىن العان بولاتىنمىن. وسى جولى شيرەك فينالدا سول بوكسشىمەن قايتا كەزدەستىم. بۇل جولى رەۆەنش جاساپ، جەڭىپ الدىم»، - دەپ پىكىر ءبىلدىردى نۇربەك ورالباي.
ەسكە سالايىق، كەشە ساعات 13:20-دا ەلوردا اۋەجايىنا قازاقستان قۇراماسىنىڭ باس باپكەرى مىرزاعالي ايتجانوۆ پەن چەمپيونداردىڭ العاشقى لەگى كەلدى.
اتاپ ايتقاندا، التىن مەدال يەلەنگەن ماحمۇد سابىرحان، اسلانبەك شىمبەرگەنوۆ پەن كۇمىس جۇلدەگەر دۋلات بەكباۋوۆ ەلگە ورالعان بولاتىن.
اۆتور:
ءاليحان اسقار