الماتىدا 4 جاسار «حرۋستال» قىزعا بىرەگەي وتا جاسالدى - فوتو

الماتى. قازاقپارات - الماتى دارىگەرلەرى سيرەك كەزدەسەتىن اۋىر دەرتپەن تۋعان بۇلدىرشىنگە بىرنەشە كۇردەلى وتا جاسادى، دەپ حابارلايدى قازاقپارات ءتىلشىسى.

№2-قالالىق كلينيكالىق اۋرۋحانانىڭ تراۆماتولوگ-ورتوپەد ماماندارى مايتاباننىڭ تۋا ءبىتتى اۋىر تۇرىمەن جانە جەتىلمەگەن وستەوگەنەز (سۇيەكتەرى مورت سىنادى) دەرتىمەن قاتار اۋىراتىن 4 جاستاعى كىشكەنتاي قىزعا وپەراتسيا جاسادى.

ءبىر ساعاتتان استام ۋاقىتقا سوزىلعان وتا پونسەتي ورىس قاۋىمداستىعى پرەزيدەنتى ماكسيم ۆاۆيلوۆتىڭ قاتىسۋىمەن وتكەن بىرەگەي شەبەرلىك كلاسى بارىسىندا جاسالدى.

اۋرۋحانا باسپا ءسوز قىزمەتىنىڭ دەرەگىنشە، تۋا ءبىتتى اقاۋدى تۇزەتۋ ماقساتىندا پاتسيەنتكە ءسىڭىر اۋىستىرۋ، احيلوپلاستيكا، اۋتوترانسپلانتانت ورناتۋ سىندى بىرنەشە حيرۋرگيالىق مانيپۋلياتسيا جاسالدى. كۇردەلى وپەراتسيالار مىندەتتى الەۋمەتتىك مەديتسينالىق ساقتاندىرۋ ەسەبىنەن جاسالدى.

تراۆماتولوگيا بولىمشەسىنىڭ مەڭگەرۋشىسى ەرلان سادىرباليننىڭ ايتۋىنشا، سۇيەكتەرى مورت سىناتىن بولعاندىقتان ۇزاق ۋاقىت بويى وتا جاساۋعا مۇمكىندىك بولمادى. وسى ۋاقىتقا دەيىن ول ەلورداداعى «انا مەن بالا» عىلىمي-زەرتتەۋ ينستيتۋتىنىڭ الماستىراتىن تەراپياسىمەن شەكتەلىپ كەلگەن.

«بالا ىشتەن وسىنداي دەرتپەن تۋعان. ۋاقىت وتە كەلە تاباندارى اۋىرىپ، ءپىشىنى وزگەرگەن. بالا بولىپ جۇگىرىپ، سەكىرمەك تۇگىل، اياعى باسقاندا دا اۋىراتىن. ءبىز كوپكە دەيىن وعان وپەراتسيا جاساي المادىق. ەگەر جاساساق سۇيەكتەر شىداماي، سىنىپ كەتەتىن ەدى. سول سەبەپتى بالانىڭ سۇيەگى قاتقانشا، ياعني 4 جاسقا دەيىن كۇتتىك. ۆالگۋستى مايتابانعا وتا جاسالدى، ەندى ول جوعارىدا ايتىلعان شاعىمداردىڭ ءبىر بولىگىنەن ارىلۋى ءتيىس»، - دەيدى ەرلان سادىربالين.

كىشكەنتاي پاتسيەنت اۋرۋحانادان شىقتى. الداعى ۋاقىتتا ول مەديتسينالىق وڭالتۋدان وتەدى.