08:29, 24 - تامىز 2021 | GMT +6
سەمەي تۇرعىنىنا بوتەننىڭ كولىگىن 4 ميلليون تەڭگەگە ساتىپ جىبەرگەن ەلوردالىق ۇستالدى
سەمەي. قازاقپارات - سەمەي قالاسىنىڭ تۇرعىنىنا بوتەننىڭ كولىگىن 3900000 تەڭگەگە ساتىپ جىبەرگەن ەلوردالىق ۇستالدى، دەپ حابارلايدى قازاقپارات ءتىلشىسى.
قالالىق پوليتسيا باسقارماسى باسپا ءسوز قىزمەتىنىڭ مالىمەتىنە سۇيەنسەك، پوليتسياعا حابارلاسقان ەر ادام الاياقتىڭ ارباۋىنا ىلىككەنىن جەتكىزدى.
«انىقتالعانداي، جابىرلەنۋشى بەيتانىس بىرەۋدەن 3900000 تەڭگەگە Toyota ماركالى اۆتوكولىكتى ساتىپ العان. الايدا كولىك مۇلدە باسقا ادامنىڭ اتىندا بولىپ شىقتى. كريمينالدىق پوليتسيا ءبولىمىنىڭ قىزمەتكەرلەرى جەدەل-ىزدەستىرۋ شارالارى بارىسىندا نۇر-سۇلتان قالاسىنىڭ 29 جاستاعى تۇرعىنىن ۇستادى»، - دەلىنگەن اقپاراتتا.
قازىرگى ۋاقىتتا اتالعان فاكتى بويىنشا ق ر قىلمىستىق كودەكسىنىڭ 190-بابى 3-بولىگىمەن سوتقا دەيىنگى تەرگەۋ امالدارى جۇرگىزىلۋدە.