ازيا چەمپيوناتى: بۇگىن 4 بوكسشىمىز التىن ءۇشىن جۇدىرىقتاسادى
كەشە، 25- ءساۋىر كۇنى «سارى قۇرلىق» دوداسىندا جارتىلاي فينالدىق كەزدەسۋلەر ءوتتى. 1/2 فينالعا بارلىعى 11 قازاقستاندىق بوكسشىمىز (ەرلەر، ايەلدەر) شىققانىن جازعان بولاتىنبىز. جەكپە-جەكتەردىڭ ناتيجەسىندە اقتىق سىنعا 4 سپورتشىمىز سۇرىنبەي ءوتتى، قالعانى قولا مەدالداردى قاناعات تۇتتى.
اتاپ ايتقاندا، «التىن» ءۇشىن 60 كەلى سالماقتاعى قازاقستاندىق بوكسشى زاكىر سافيۋللين مونعوليالىق تسەندبااتار ەردەنەباتپەن، 75 كەلى سالماقتاعى تۇرسىنباي قۇلاحمەت ءۇندىستاندىق اشيش كۋمارمەن، 81 كەلى ساناتتاعى بەك نۇرماعانبەت فيليپپين بوكسشىسى دجون نوبەل مارۆينمەن باق تالاستىرادى. ال قازاقستان ۇلتتىق قۇراماسىنىڭ كاپيتانى، اسا اۋىر سالماقتاعى قامشىبەك قوڭقابايەۆ وزبەكستاندىق باحودير جالولوۆپەن جۇدىرىقتاسادى.
ازيا چەمپيوناتىنىڭ فينالدىق كەزدەسۋلەرى بۇگىن، 26- ءساۋىر كۇنى وتەدى. ونى تىكەلەي ەفيردەن ق ر بوكس فەدەراتسياسىنىڭ سايتىنان كورۋگە بولادى، باستالۋ ۋاقىتى - ساعات 12.00-دە.
اۆتور: كۇنسۇلتان وتارباي