كەزەكتەن تىس پرەزيدەنت سايلاۋىن وتكىزۋگە 4 سەبەپ بار - ايدوس سارىم

 نۇر- سۇلتان. قازاقپارات - تانىمال ساياساتتانۋشى جانە قوعام قايراتكەرى ايدوس سارىم كەزەكتەن تىس پرەزيدەنت سايلاۋىن وتكىزۋدىڭ ءتورت سەبەبىن اتادى، دەپ حابارلايدى قازاقپارات ءتىلشىسى.

«گەوساياسات. تۇڭعىش پرەزيدەنتتىڭ ءوز وكىلەتتىگىن توقتاتۋىن كوپشىلىك كۇتپەدى. العاشقى كۇندەرى ەل باسشىلىعىمەن ءبىر عانا قىتاي ەلشىسى بەس رەت كەزدەستى. ترانزيتكە كىرۋگە بولادى، بۇل وڭاي. ءبىراق، وندا قالىپ قويۋعا دا بولادى. بىزگە الەمنەن وقشاۋلانۋعا، ستراتەگيالىق بەلگىسىزدىككە جول بەرۋگە بولمايدى. ەكەۋى دە ىشكى شارۋالارىمىزعا ۇلكەن ويىنشىلاردىڭ كيلىگۋىنە اكەپ سوعادى» ، - دەپ جازدى ساياساتتانۋشى ءوزىنىڭ Telegram كانالىندا.

ەكىنشىدەن، سايلاۋ ينۆەستيتسيالىق جانە بيزنەس احۋالعا اسەر ەتەدى.

 «وتاندىق جانە عالامدىق بيزنەستىڭ ويىن ەرەجەلەرىن ۇزارتۋدى نەمەسە جاڭا، تۇسىنىكتى ەرەجەلەردى كۇتىپ وتىرعانى جاسىرىن ەمەس. وتكەن جىلمەن سالىستىرعاندا، ىشكى ينۆەستيتسيالار ەكى ەسە ازايدى. ءتىپتى ءىرى رەيتينگ اگەنتتىكتەرى دە كەزەكتەن تىس سايلاۋعا يشارا جاساۋدا» ، - دەپ اتاپ ءوتتى ول.

ءۇشىنشى سەبەپ رەتىندە ساياستاننۋشى بيلىك پەن مەملەكەتتىك اپپاراتتىڭ بىرلىگىن اتادى.

«ءبىزدىڭ ەليتا كۇردەلىلىك پەن بەلگىسىزدىك جاعدايىندا جۇمىس ىستەي المايدى. ەگەر وتپەلى كەزەڭ ۇزاققا سوزىلار بولسا، مەملەكەتتىك اپپارات پەن ەليتانىڭ ءبىر بولىگى بۇزىلادى. 2004 -جىلدى، اسار پارتياسىن ەسكە الايىق. كەلەسى جىلعا دەيىن سوزساق، قوعامدى السىرەتىپ الامىز» ، - دەپ ەسەپتەيدى ساراپشى.

سونىمەن بىرگە، ا. سارىمنىڭ پىكىرىنشە، سايلاۋ ەلدەگى پارتيالىق- ساياسي جاعدايعا وڭ ىقپالىن تيگىزەدى.

«سايلاۋ ەلدەگى پارتيالىق- ساياسي جۇيەنى قايتا جاڭارتادى، 2001 -جىلعى جىككە ءبولىنۋدى جابادى. قازىردىڭ وزىندە پارتيالىق امبيتسياسى تۋرالى ايتا الاتىن ەڭ كەمى 5-6 ويىنشى پايدا بولدى. بۇل سايلاۋ - ءبىز ءۇشىن ۇلكەن مۇمكىندىك» ، - دەپ ءسوزىن تۇيىندەدى ول.