قازاقستاندا تاعى 4 تۇرمە جابىلادى

سونىڭ ءبىر باعىتى - تۇرمەدە وتىرعانداردىڭ سانىن ازايتۋ، دەپ حابارلايدى قازاقپارات ءتىلشىسى.

باس پروكۋروردىڭ ورىنباسارى مارات احمەتجانوۆتىڭ ايتۋىنشا، 27 جىلدىڭ ىشىندە ەلىمىزدە تۇرمەگە قامالعانداردىڭ سانى 68,5 مىڭ ادامعا ازايدى. تاۋەلسىزدىكتىڭ العاشقى جىلدارى قازاقستان وسى كورسەتكىش بويىنشا الەمدە ءۇشىنشى ورىندا تۇردى.

«ول كەزدە ءاربىر جەتىنشى وتباسىدا سوتتالعان ءبىر ادام بولدى. دەگەنمەن، اتالعان كورسەتكىش بىرتىندەپ ازايدى. قازىرگى كەزدە رەسپۋبليكا بويىنشا 29913 ادام تۇرمەدە وتىر»، - دەدى م. احمەتجانوۆ ەلوردادا وتكەن باسپا ءسوز ءماسليحاتىندا.

ونىڭ سوزىنە قاراعاندا، وسى ۋاقىتقا دەيىن 8 تۇرمە جابىلدى. سونىڭ ناتيجەسىندە 12 ميلليارد تەڭگە كولەمىندە بيۋدجەت قاراجاتى ۇنەمدەلدى. بۇدان بولەك، الداعى ۋاقىتتا تاعى 4 ەسكى كولونيا جابىلادى.

«ءبىر جىلدىڭ ىشىندە تۇرمەدە وتىرعان ادامداردىڭ سانىنا قاتىستى حالىقارالىق رەيتينگتە قازاقستان ءوز پوزيتسياسىن 12 ساتىعا جاقسارتتى. بۇرىن 83 ورىندا ەدىك، قازىر 95 كە تۇستىك. بۇل يندەكستە 200 مەملەكەت بار. ءبىز 95-ورىندا تۇرمىز»، - دەپ اتاپ كورسەتتى م. احمەتجانوۆ.

رەسمي مالىمەتكە سايكەس، زاڭنامانى ىزگىلەندىرۋى شارالارى كەزىندە قىلمىستاردىڭ سانى ارتقان جوق. ستاتيستيكا بويىنشا قىلمىستىق ءتارتىپتى بۇزۋ وقيعالارى جىل سايىن ازايىپ كەلەدى. بىلتىر اتالعان كورسەتكىش 8 پروتسەنتكە تومەندەسە، بيىل ءۇش ايدا 6 پروتسەنتكە قىسقاردى.

«وسى ورايدا ەرەكشە اتاپ وتەر ءجايت، اسا اۋىر قىلمىس جاساعان قىلمىسكەرلەردىڭ ىستەرى ىزگىلەندىرۋگە جاتپايدى. ولاردىڭ ىشىندە ەكسترەميستەر، پەدوفيلدەر، تەرروريستەر، ۇيىمداسقان قىلمىستىق توپتىڭ مۇشەلەرى، ادام ولتىرگەن جانە قاراقشىلىق شابۋىل جاساعان قىلمىسكەرلەر بار. ونداي ىستەردىڭ كەيبىر ساناتتارى بويىنشا قىلمىستىق جاۋاپكەرشىلىك كەرىسىنشە كۇشەيتىلدى»، - دەيدى م. احمەتجانوۆ.

ايتا كەتەيىك، بۇگىنگى بريفينگتە باس پروكۋروردىڭ ورىنباسارى الەۋمەتتىك جەلىدە تاراعان ۆيدەوعا قاتىستى پىكىر ءبىلدىردى. بەلگىسىز بىرەۋ ءىرى كولەمدە اقشا جىمقىرعان بەرگەي رىسقالييەۆ  ۇلىبريتانيادا جۇرگەنىن ءتۇسىرىپ الىپتى.

بۇدان بولەك، م. احمەتجانوۆ مالدى 20 رەت ۇرلاعان بارىمتاشىلاردىڭ ۇستالعانىن مالىمدەدى.