جاڭا وقۋلىقتارعا قاتىستى 4 مىڭنان استام ەسكەرتۋ مەن ۇسىنىس ءتۇستى - ب ع م
«3, 6, 8 سىنىپتارعا ارنالعان وقۋلىقتاردى وقۋ ۇردىسىنە ەنگىزۋ بويىنشا قر بعم تاراپىنان ءبىرقاتار جۇمىستار جۇرگىزىلدى. بارلىق وقۋلىقتار رەسپۋبليكانىڭ 30 پيلوتتىق مەكتەبىندە عىلىمي- پەداگوگيكالىق ساراپتاما مەن اپروباتسيادان وتكىزىلدى. وقۋلىقتاردى قوعامدىق باعالاۋدى ۇيىمداستىرۋ بويىنشا قىرۋار جۇمىستار اتقارىلدى»، - دەلىنگەن حابارلامادا.
اتالمىش وقۋلىقتاردىڭ جوبالارى «وقۋلىق» رەسپۋبليكالىق عىلىمي- تاجىريبەلىك ورتالىعىنىڭ «قوعامدىق باعالاۋ» پورتالىنا ورنالاستىرىلعان. كىتاپتارعا قاتىستى ۇستازدار مەن مەن اتا- انالار قاۋىمداستىعىنان 4 مىڭنان استام ەسكەرتۋ مەن ۇسىنىس كەلىپ تۇسكەن. مينيسترلىكتىڭ مالىمەتىنشە، وقۋلىقتاردى جەتىلدىرۋ بارىسىندا بارلىق ۇسىنىستار ەسكەرىلەدى.
3, 6, 8 - سىنىپتارعا ارنالعان وقۋلىقتاردىڭ مازمۇنىمەن پەداگوگتاردى تانىستىرۋ ماقساتىندا وتكەن جىلعى قاراشا ايىندا ەلىمىزدىڭ بارلىق وڭىرلەرىندە ادىستەمەلىك سەمينارلار ءوتتى. اتالمىش شارالارعا وقۋلىقتاردىڭ 160 اۆتورى مەن 7 مىڭنان استام مۇعالىم مەن ادىسكەر قاتىستى. كەزدەسۋلەرگە قاتىسۋشىلار وقۋلىقتاردىڭ قۇرىلىمى مەن مازمۇنى بويىنشا ءوز ۇسىنىستارى مەن ەسكەرتۋلەرىن جەتكىزدى.
وقۋلىقتاردىڭ ساپاسىن ارتتىرۋ ءۇشىن ساراپتاما قورىتىندىسىن قاراستىرۋ بويىنشا قۇرىلعان پاندىك كوميسسيا قۇرامى 120 ادامعا ۇلعايتىلعان. كوميسسياعا ءماجىلىس دەپۋتاتتارى، قوعامدىق ۇيىمداردىڭ وكىلدەرى كىردى. 3, 6, 8 سىنىپتارعا ارنالعان وقۋلىقتار پاندىك كوميسسيالاردىڭ ەكى وتىرىسىندا قارالدى.
وقۋلىقتاردىڭ لينگۆيستيكالىق ساراپتاماسى جانە الەۋمەتتىك قابىلدانۋىن قاراستىرۋ ماقساتىندا ق ر ب ع م العاش رەت جاڭا جۇمىس توبىن ۇيىمداستىرىپ، جۇمىس توبىنا وقۋ ليتەراتۋراسىنىڭ ساراپشىلارى، ۇزدىك مۇعالىمدەر مەن ا. بايتۇرسىنوۆ اتىنداعى ءتىل ينستيتۋتىنىڭ قىزمەتكەرلەرى، جۋرناليستەر جانە قوعام وكىلدەرىن، بارلىعى 74 ادام مۇشەلىككە قابىلدادى.
