اقتوبەدەگى دالا ورتىنەن مەرت بولعان اكىمنىڭ 4 بالاسى جەتىم قالدى
ال الەۋمەتتىك پەداگوگ جولدىبەك ءابدىسالىموۆتىڭ ەكى بالاسى بار، دەپ حابارلايدى قازاقپارات ءتىلشىسى.
اقتوبە وبلىسى، ايتەكە بي اۋدانى، سۇلۋكول اۋىلىندا دالا ءورتىن ءسوندىرىپ جۇرگەن كەزدە دەنەسىن كۇيىك شالىپ، وقيعا ورنىندا قازا بولعان اۋىل اكىمى باتىربەك بىرلەپەسوۆ پەن اۋرۋحانادا كوز جۇمعان جولدىبەك ءابدىسالىموۆ تۋرالى بۇعان دەيىن حابارلاعان بولاتىنبىز. اۋدان اكىمدىگى قازىر مارقۇمداردى اقتىق ساپارعا شىعارىپ سالۋ ءراسىمىن ۇيىمداستىرىپ جاتىر.
«باتىربەك بىرلەپەسوۆ 1976 -جىلى تۋعان. ءبىلىمى جوعارى. ءارتۇرلى سالادا جۇمىس ىستەدى. 2015 -جىلدان بەرى سۇلۋكول اۋىلدىق وكرۋگىنىڭ اكىمى قىزمەتىن اتقاردى. ونىڭ ءتورت بالاسى بار. ال جولدىبەك ءابدىسالىموۆ 1978 -جىلى تۋعان. ارناۋلى ورتا ءبىلىمدى. 2013 -جىلدىڭ ناۋرىز ايىنان باستاپ سۇلۋكول ورتا مەكتەبىندە الەۋمەتتىك پەداگوگ بولىپ جۇمىس ىستەگەن. وتباسىلى، ارتىندا ەكى بالاسى قالدى. قازا بولعانداردىڭ ساداقاسىن جاساپ، جەرگەۋ ءراسىمىن ۇيىمداستىرامىز.
«ازاماتتىق قورعاۋ تۋرالى» زاڭىنا سۇيەنە وتىرىپ كومەك كورسەتەمىز. قازىرگى كۇنى اۋىل تۇرعىندارى، اقساقالدار جينالىپ، تۋىستارىنا كوڭىل ايتتىق. كومەك كورسەتىلىپ جاتىر»، - دەدى ايتەكە بي اۋدانى اكىمىنىڭ ورىنباسارى تەمىربەك راحمەتوۆ.
سونداي- اق وسى ءورت وقيعاسىنان دەنەسىن كۇيىك شالعان ەكى ادام اۋرۋحانادا ەم قابىلداپ جاتىر.
«اتالعان اۋىلدا بولعان ءورت كەزىندە ءۇش ادام اۋرۋحاناعا جەتكىزىلدى. ونىڭ بىرەۋى قازا بولدى. قازىرگى كۇنى ەكى اۋىل تۇرعىنى ەم قابىلداپ جاتىر. نەگىزى ايتەكە بي اۋدانىنىڭ ايكە اۋىلىنان 15 ادام 3 تەحنيكا، اقتاستىدان 6 ادام ءۇش تەحنيكا، سۇلۋكول اۋىلىنان 5 ادام ءبىر تەحنيكا ءورت سوندىرۋگە قاتىستى. ءورت سوندىرۋگە ەرىكتىلەر شىقتى. №7 جەدەل ءورت ءسوندىرۋ بولىمىنەن 9 ادام جۇمىلدىرىلدى. ق ر «ازاماتتىق قورعاۋ تۋرالى» زاڭىنىڭ «ورتتەردى ءسوندىرۋ» بابى بويىنشا مەملەكەتتىك ورتكە قارسى قىزمەت بولىمشەلەرى جوق اۋىلدارداعى دالالىق ورتتەردى جەرگىلىكتى اتقارۋشى ورگاندار سونىدىرۋگە مىندەتتى. زاڭعا سايكەس جەرگىلىكتى اتقارۋشى بيلىك ەرىكتىلەردى دايىندايدى، وقىتادى، ارنايى جاۋىنگەرلىك كيىممەن جابدىقتايدى»، - دەدى اقتوبە وبلىستىق ت ج د باسپا ءسوز جەتەكشىسى دينارا اتراۋبايەۆا.
اۆتور: التىناي ساعىندىقوۆا