10:38, 31 - ناۋرىز 2016 | GMT +5
دوپينگ قابىلداعان اۋىر اتلەت 4 جىلعا سپورتتان قۋىلدى
استانا. قازاقپارات - 2015-جىلى حيۋستوندا وتكەن اۋىر اتلەتيكادان الەم چەمپيوناتىندا دوپينگپەن ۇستالعان العاشقى سپورتشىعا شەشىم شىقتى دەپ حابارلايدى الامان پورتالى.
IWF حيۋستونداعى الەم چەمپيوناتىندا دوپينگ قولداندى دەپ ايىپتالعان تۇركمەنستاندىق ۋميربەك بازاربايەۆتى ءتورت جىلعا سپورتتان شەتتەتتى.
ول ەندى سپورتقا تەك 2019-جىلدىڭ سوڭىندا ورالادى. ونىڭ سپورتتان كەتكەن ۋاقىتى 2015-جىلدىڭ جەلتوقسانىنان باستاپ ەسەپتەلەدى. تۇركمەنستاندىق اتلەت حيۋستوندا 15-ورىن العان.
ۋميربەك بازاربايەۆ 2012-جىلى لوندون وليمپياداسىنا قاتىسىپ، 62 كەلىدە ۇزدىك التىلىققا ەنگەن ەدى.
حيۋستونداعى الەم چەمپيوناتىنان كەيىن قازاقستاندىق الماس وتەشوۆ پەن جاسۇلان قىدىربايەۆ تا دوپينگ داۋىنا ىلىككەن. قازاقستان اۋىر اتلەتيكا فەدەراتسياسى «ب» تەكسەرىسىن وتكىزبەيتىنىن، قوس سپورتشىعا قاتىستى ناقتى شەشىم ناۋرىز ايىنىڭ سوڭىنا دەيىن جاريالاناتىنىن ايتقان.
