سوتتاردىڭ شەتەلدىكتەردى ەلدەن شىعارۋ تۋرالى شەشىمدەرى 4 ەسەگە ارتىق بولدى

استانا. قازاقپارات - 2015 -جىلدىڭ 1 -قاڭتارىنان باستاپ قازاقستان رەسپۋبليكاسىندا اكىمشىلىك قۇقىق بۇزۋشىلىقتار تۋرالى جاڭا كودەكس قولدانىسقا ەنگىزىلدى.

ونى قولدانۋ اياسىندا ەلىمىزدە 3226291 اكىمشىلىك قۇقىق بۇزۋشىلىق تىركەلىپ، بۇل 2014 -جىلدىڭ ۇقساس كەزەڭىمەن سالىستىرعاندا 25 پايىزعا ارتىق بولدى.

 «اكىمشىلىك پراكتيكا سۋبەكتىلەرى ايىپپۇل سالۋ تۋرالى 10 پايىزعا ارتىق قاۋلى (2256873)، 30 پايىزعا - ەسكەرتۋ (527136) شىعارعان، سونىمەن قاتار سوتتار شەتەلدىكتەردى اكىمشىلىك تۇرعىدا ەلدەن شىعارۋ تۋرالى 4 ەسەگە ارتىق (8386) شەشىم شىعارعان كورىنەدى»، - دەلىنگەن قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ مالىمەتىندە.

سونىمەن قاتار، ءبىرقاتار ارەكەتتەردىڭ قىلمىستىق تەرىس قىلىق دارەجەسىنە اۋىسۋىنا بايلانىستى، اكىمشىلىك قاۋماۋعا الۋعا تارتىلعان ادامداردىڭ 15 پايىزعا ازاعانى بايقالادى.

كوميتەت مالىمەتىنە قاراعاندا، اكىمشىلىك ايىپپۇلداردىڭ ءوندىرىلۋى 52 پايىزدى قۇرادى. اعىمداعى جىلى سالىنعان 42 ميلليارد تەڭگە اكىمشىلىك ايىپپۇلدان 21,7 ميلليارد تەڭگە ءوندىرىلدى. سونىمەن قاتار ۇستىمىزدەگى جىلى وتكەن جىلداردىڭ ايىپپۇلدارى بويىنشا 6 ميلليارد تەڭگەدەن استام سوماعا 68 مىڭ قاۋلى ورىندالدى.

ايماقتار بولىگىندەگى ەڭ كوپ ءوندىرۋ استانا قالاسى (%84)، ماڭعىستاۋ (%76)، باتىس قازاقستان (%64) جانە وڭتۇستىك قازاقستان (%56) وبلىستارىندا بەلگىلەندى. ايىپپۇلداردى جيناۋدىڭ ەڭ تومەنگى كورسەتكىشى پاۆلودار وبلىسىندا (%35) جانە الماتى قالاسىندا (%38) بايقالادى.

ايتا كەتەيىك، انىقتالعان ۇساق قۇقىق بۇزۋشىلىقتاردىڭ سانى 46 پايىزعا ارتقان، ياعني وسىنداي 1560257 ارەكەت تىركەلدى.

اۆتور: رۋسلان عابباسوۆ