تۇركىستاندىق دارىگەرلەر اسقازان كولەمىن كىشىرەيتۋ بويىنشا 48 وتا جاساعان
وبلىستىق كلينيكالىق اۋرۋحانانىڭ دارىگەرلەرى جۋىردا عانا سالماعى 135 ك گ كەلەتىن ناۋقاسقا وسىنداي وتا جاساعان. 47 جاستاعى ازامات سەمىزدىكتەن باسقا، ارتەريالىق گيپەرتەنزياعا شالدىققان. قوسىمشا شاعىمدارى دا كوپ بولعان. دارىگەرلەردىڭ ايتۋىنشا، وتادان كەيىنگى ون كۇن ىشىندە ناۋقاس 10 كەلى سالماق جوعالتىپ، ءوزىن الدەقايدا جاقسى سەزىنگەن.
«سەمىزدىككە شالدىققان ناۋقاس بىردەن وپەراتسياعا جىبەرىلمەيدى. بۇل ەمدەۋدىڭ قاتاڭ كورسەتكىشتەرى بولۋى ءتيىس. ادەتتە، الدىمەن ديەتا جانە دەنە شىنىقتىرۋمەن اينالىسۋى كەرەك. كەيدە پسيحوكوررەكتسيا قولدانىلادى. ەگەر مۇنىڭ ءبارى كومەكتەسپەسە، وندا حيرۋرگياعا جۇگىنۋگە بولادى. ادەتتە وتا دەنە سالماعىنىڭ يندەكسى 35 تەن اساتىن ناۋقاستارعا جاسالادى. بۇل كورسەتكىشتى فورمۋلا بويىنشا ەسەپتەۋگە بولادى»، - دەيدى جوعارى ساناتتى حيرۋرگ- دارىگەر جەڭىس سەرعازين.
مامانداردىڭ ايتۋىنشا، وتادان كەيىن ادام 15-80 كەلىگە دەيىن سالماق جوعالتادى. الايدا دارىگەرلەر بۇل وتا سوڭعى شارا دەپ تۇسىندىرەدى. باسقا امالدار تاۋسىلعان كەزدە عانا وپەراتسيانىڭ كومەگىنە جۇگىنۋى كەرەك. بۇگىندە تۇركىستان وبلىستىق كلينيكالىق اۋرۋحاناسىندا سالماق جوعالتۋ وپەراتسيالارىنىڭ بىرنەشە ءتۇرى جاسالۋدا.