04:18, 17 - قىركۇيەك 2016 | GMT +5
سۇيىكتى فۋتبولشىلارىن كورگەن جانكۇيەر 45 مينۋتتان سوڭ قايتىس بولدى
استانا. قازاقپارات - اعىلشىننىڭ «مانچەستەر يۋنايتەد» كلۋبىنا ءومىر بويىنا جانكۇيەر بولعان فانات سۇيىكتى فۋتبولشىلارىن كورگەن سوڭ، 45 مينۋتتان سوڭ قايتىس بولدى.
بۇل تۋرالى Sports.ru سايتى حابارلايدى.
73 جاستاعى پاتريك لوۋلەر قاتەرلى ىسىككە شالدىققان. ول اۋرۋحانا توسەگىنە تاڭىلعانعا دەيىن سۇيىكتى كلۋبىنىڭ ويىندارىن تاماشالاپ جۇرگەن. كەيىن قاريانىڭ نەمەرەسى ءوز اتاسى تۋرالى الەۋمەتتىك جەلىلەرگە جازىپ، ونىڭ فۋتبولشىلاردى ءبىر كورسەم دەگەن ارمانى بارىن ايتادى.
«مانچەستەر يۋنايتەد» باسشىلىعى بۇل ۇندەۋگە قۇلاق اسىپ، كوماندانىڭ ۇزدىك ويىنشىلارى اۋرۋحانادا جاتقان جانكۇيەر پاتريك لوۋلەردىڭ كوڭىلىن سۇراپ كەلەدى.
وكىنىشكە قاراي، ءوز كومانداسىنىڭ ويىنشىلارىن كورگەن سوڭ، شامامەن 45 مينۋت ۋاقىت وتكەندە پاتريك قايتىس بولدى.
بۇل وقيعا الەم فۋتبولىنىڭ جانكۇيەرلەرىن بەي-جاي قالدىرعان جوق.
