استانادا 45 ەلدىڭ جاس كوشباسشىلارى باس قوسادى
استانا. قازاقپارات - الداعى كۇندەرى «نۇر وتان» پارتياسىنىڭ قولداۋىمەن نازاربايەۆ ۋنيۆەرسيتەتىندە 45 ەلدىڭ جاس كوشباسشىلارىنىڭ باسىن قوساتىن Shape Eurasia كەزدەسۋى وتەدى، دەپ حابارلايدى massaget.kz ءتىلشىسى.
بۇل فورۋم - ىقپالداسۋ مەن الەمدىك ءۇن قاتىسۋ تۇرعىسىنان ەۋرازيالىق قۇرلىقتىڭ ىشكى-سىرتقى وزگەرىستەرىن تالقىلاۋ ماقساتىندا ءتۇرلى ايماقتاردىڭ جاس ليدەرلەرىنىڭ باسىن قوساتىن الاڭ.
بۇل ورايدا Massaget.kz پورتالى وسى شارانى ۇيىمداستىرۋشىلاردىڭ ءبىرى - Global Shapers استانا حابىنىڭ كۇش سالۋىمەن وسى تاڭعا دەيىن ىسكە اسىرىلعان جوبالاردىڭ ءبىر شوعىرىن نازارعا الدى.
باستاماشىل توپ 2012-جىلى ءوزىنىڭ العاشقى Cafe Scientifique جوباسىن ىسكە قوستى. ياعني، Cafe Scientifique http://www.cafescientifique.org - بۇل عىلىمدى ناسيحاتتايتىن جانە عىلىمي جەتىستىكتەردى قالىڭ بۇقاراعا تۇسىنىكتى ەتەتىن، حالىقارالىق ۇلگى.
مۇنىڭ ەرەكشەلىگى - Cafe Scientifique قوناقتاردىڭ كوفە-شاي ۇستىندە سپيكەرلەرمەن ەركىن اڭگىمەلەسىپ، كەي تۇستاردا «ورىنسىز سۇراقتاردى» قويىپ، عىلىمنىڭ ءبىزدىڭ كۇندەلىكتى ومىرىمىزدە بار ەكەنىن ءتۇسىندىرۋ ارقىلى جاس قاتىسۋشىلاردىڭ تانىمىن كەڭەيتەتەتىن بەيرەسمي احۋالدا وتەتىن شارا. جوبا اۆتورى استانالىق شەيپەر ايگەرىم حافيزوۆا.
ال 2013-جىلى تاعى ءبىر شەيپەر داۋرەن اۋباكىروۆ Action Forum جوباسىن ىسكە اسىرۋدى ۇسىندى. بۇل بەلسەندى جاستاردى تالقىلاۋدىڭ اقىرى ناقتى ارەكەتكە اينالاتىن، بيزنەس، عىلىم، تەحنولوگيا، مەملەكەتتىك جانە قوعامدىق سەكتوردىڭ باسشىلارىمەن ءوزارا ارەكەت ەتۋگە باعىتتالعان جۇيەلى الاڭ.
Action Forum كەزدەسۋى شەڭبەرىندە مامانداردىڭ تەگىن كەڭەسى ۇيىمداستىرىلادى، تاجىريبە الماسۋ وتەدى، ءوزارا ءتيىمدى ارىپتەستىك پەن وزارا كومەكتى ىسكە اسىرۋ مۇمكىندىگى اشىلادى.
جوبا شەڭبەرىندە جەنيەۆا بيزنەس مەكتەبى تۇلەگى ءالينا ءابدىراحمانوۆا، «پو-چەسنوكۋ» ينتەرنەت-بلوگىنىڭ اۆتورى سلاۆا نەرۋش، «بايتەرەك» ۇلتتىق باسقارما حولدينگىنىڭ اتقارۋشى ديرەكتورى قانىش تىلەۋشىي جانە باسقالار سويلەدى.
ودان بەرگى كەزەڭدە حاب مۇشەلەرى تاراپىنان «مەن 100 جاسقا كەلگەنشە» جانە «دەربەس قارجى الىپپەسى» جوبالارى ىسكە اسىرىلدى. بۇل جوبالاردىڭ تۇساۋكەسەرىنەن كەيىن، Global Shapers كەزدەسۋىندە شەتەلدىك قاتىسۋشىلار ولاردى ءوز وكىلدىكتەرىندە ىسكە اسىردى.
«نۇر وتان» پارتياسىنىڭ ساياسي مەنەدجمەنت مەكتەبىنىڭ ديرەكتورى، Global Shapers استانا حابىنىڭ كۋراتورى اسەت ابدۋاليەۆتىڭ ايتۋىنشا، بۇدان دا باسقا جوبالاردى مىسالعا كەلتىرۋگە بولادى.
«ءبىزدىڭ ۇيىمنىڭ ناقتى قارجىلاندىرۋ كوزى جوق. ءبارى ەرىكتى تۇردە جاسالادى. ارينە، ماقساتتى اۋديتوريامەن عانا ەمەس، سونداي-اق، قاتىسۋشىلارمەن بايلانىس ورناتۋدا الەۋمەتتىك جەلىلەردىڭ ورىنى زور»، - دەپ اتاپ ءوتتى ول.
ايتا كەتەيىك، Global Shapers Community in Astana جوبالارى الەۋمەتتىك باستامالار كوتەرىپ قانا قويماي، استانالىق جاستاردىڭ كاسىبي جانە شىعارماشىلىق جاعىنان دامۋىنا باعىتتالعان. ال عىلىمي قۇراۋىش ونىڭ ستراتەگيالىق ءبىر تارماعى بولىپ تابىلادى.
جالپى، Global Shapers Community - 20 مەن 30 جاس ارالىعىنداعى كوشباسشى جاستاردىڭ قاۋىمداستىعى. دۇنيەجۇزىلىك ەكونوميكالىق فورۋم بۇكىل الەم جاستارىنىڭ بولاشاعى ءۇشىن وسىنداي ساياسي پلاتفورما قالىپتاستىرعان. جوباعا كەز-كەلگەن ماماندىق يەسى قاتىسا الادى. ەڭ باستىسى، ولار قوعامعا پايدالى قانداي دا ءبىر جوبا ۇيىمداستىرىپ نەمەسە جاڭا يدەيا ويلاپ تابۋى ءتيىس. Global Shapers Community قاتىسۋشىلارى الەمنىڭ ءىرى قالالارىندا كەزدەسۋلەر ۇيىمداستىرىپ وتىرادى، ول جيىنداردا ءبىر-بىرىمەن يدەيا جانە تاجىريبە الماسادى.
دايىنداعان: ەركەبۇلان قايراحان
