قازاقستاندا گازبەن جۇرەتىن كولىكتەر سانى 44,5 پايىزعا ارتتى

استانا. قازاقپارات - 2018-جىلدىڭ ءبىرىنشى جارتىجىلدىعىندا ءى ءى م ورگاندارىندا گاز بالونى ورناتىلعان 89592 اۆتوكولىك تىركەلگەن.

بۇل 2017-جىلدىڭ ۇقساس مەرزىمىمەن سالىستىرعاندا 44,5  پايىزعا جوعارى، دەپ حابارلايدى قازاقپارات ءتىلشىسى قازاقستان اۆتوبيزنەس قاۋىمداستىعىنىڭ باسپا ءسوز قىزمەتىنە سىلتەمە جاساپ.

«بۇل قازاقستاندا قاڭتار-ماۋسىم ايلارىندا تىركەلگەن بارلىق اۆتوكولىكتەردىڭ 15,9  پايىزىن قۇرايدى»، دەلىنگەن حابارلامادا.

2018-جىلدىڭ العاشقى التى ايىندا تىركەلگەن كولىكتەردىڭ باسىم كوپشىلىگى جەكە تۇلعالارعا (84660 بىرلىك) تيەسىلى بولىپ شىقتى، گاز بالونى ورناتىلعان كولىكتەردىڭ نەبارى 5,5  پايىز زاڭدى تۇلعالاردىڭ (4932) مەنشىگىندە.

73008 جەڭىل كولىك تىركەلگەن، جەڭىل كوممەرتسيالىق تەحنيكا - 13694، اۋىر كوممەرتسيالىق تەحنيكا مەن اۆتوبۋستار، سايكەسىنشە - 2273 جانە 617 تىركەلىمدى قۇرايدى.

گازدىڭ باعاسى ەڭ تومەن وڭىرلەر اراسىندا ماڭعىستاۋ وبلىسى كوش باستاپ تۇر (19525 بىرلىك). ودان كەيىن تۇركىستان وبلىسى، ونىڭ ىشىندە شىمكەنت قالاسى كەلەدى (13875)، ارتىنان اقتوبە وبلىسى (11383) جانە استانا قالاسى (6031) تۇر.

قاڭتار ايىنىڭ ناتيجەلەرى بويىنشا، وڭتۇستىك قازاقستان وبلىسى كولىكتەرگە گاز بالونىن ورناتۋ بويىنشا الدا تۇر. بۇل وڭىردە 13018 اۆتوكولىك تىركەلگەن.