قازاقستاندا 418 يندۋستريالىق جوبا ىسكە اسىرىلادى

بۇل تۋرالى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ۇلتتىق ەكونوميكا ءمينيسترى اسەت ەرعاليەۆ ايتتى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، «قازاقستاندىقتاردىڭ ءال- اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ» ۇلتتىق جوباسى 5 باعىتتى قامتيدى. بۇل - يندۋستريالىق- يننوۆاتسيالىق دامۋ، مۇناي- گاز- حيميا جانە ەنەرگەتيكا كەشەندەرىن، گەولوگيا سالاسىن دامىتۋ، سونداي- اق شيكىزاتتىق ەمەس ەكسپورتتى ىلگەرىلەتۋ. وسى باعىتتاردى ىسكە اسىرۋ اياسىندا 6 مىندەت، 13 كورسەتكىش جانە 56 ءىس- شارا كوزدەلگەن.

ۇلتتىق جوبانى قارجىلاندىرۋدىڭ جالپى كولەمى 15,9 تريلليون، ونىڭ ىشىندە رەسپۋبليكالىق بيۋدجەتتەن 402 ميلليارد تەڭگە قاراستىرىلعان. 15,5 تريلليون تەڭگە جەكە ينۆەستيتسيالار تارتۋ كوزدەلىپ وتىر.

ۇلتتىق جوبانىڭ «يندۋستريالىق- يننوۆاتسيالىق دامۋ» باعىتى اياسىندا ەكى نەگىزگى مىندەت ايقىندالدى: وڭدەۋشى ونەركاسىپ كاسىپورىندارىن تەحنولوگيالىق جاڭعىرتۋ، سونداي- اق ءوندىرىس كولەمىن ۇلعايتۋ، سونداي- اق وڭدەۋ ونەركاسىبى تاۋارلارىنىڭ نومەنكلاتۋراسىن كەڭەيتۋ.

«ءبىرىنشى مىندەتتى شەشۋ ءۇشىن كاسىپورىنداردىڭ جاڭا تەحنولوگيالاردى ساتىپ الۋعا جانە ەنگىزۋگە، جابدىقتاردى مونتاجداۋعا جانە ىسكە قوسۋ- جوندەۋ جۇمىستارىنا، سونداي- اق بىلىكتىلىكتى ارتتىرۋعا، تەحنولوگيالىق جابدىقتاردى ساتىپ الۋعا جانە كرەديت بەرۋ، ونىڭ ىشىندە ليزينگ شارتتارىن جاقسارتۋعا جۇمسالعان شىعىندارىن وتەۋگە باعىتتالعان كەشەندى ءىس- شارالاردى ىسكە اسىرۋ كوزدەلەدى»، - دەدى ول.

ونىڭ اتاپ وتۋىنشە، 2025 -جىلعا دەيىن وڭدەۋشى ونەركاسىپتەگى تسيفرلىق تەحنولوگيالاردى پايدالاناتىن كاسىپورىنداردىڭ ۇلەسىن 7-دەن 23 پايىزعا دەيىن ارتتىرۋ جوسپارلانعان.

«2025 -جىلعا قاراي 418 يندۋستريالىق جوبا ىسكە اسىرىلىپ، نەگىزگى كاپيتالعا 11 تريلليون تەڭگەدەن اسا ينۆەستيتسيا تارتىلادى. ناتيجەسىندە وڭدەۋ ونەركاسىبى ءوندىرىسىنىڭ كولەمى 2020 -جىلدىڭ دەڭگەيىنە 1,5 ەسەگە ارتادى»، - دەدى اسەت ەرعاليەۆ.

اۆتور: مارلان جيەمباي