قازاقستاندىقتار باسپانا الاردا 40 پايىزعا دەيىن ۇنەمدەي الادى - زەرتتەۋ

استانا. قازاقپارات - قازاقستاندىقتار ءۇشىن 2020 -جىلى پايدالانۋعا بەرىلەتىن كوپقاباتتى تۇرعىن ۇيلەردەن پاتەر الۋ الماتىدا 42,3 پروتسەنتكە، ال استانادا - 16,3 پروتسەنتكە تومەن بولادى، دەپ حابارلايدى قازاقپارات ranking.kz سايتىنا سىلتەمە جاساپ.

زەرتتەۋدە اتالىپ وتىلگەندەي، جاڭا سالىنعان ۇيلەرگە قاراعاندا، سالىنىپ جاتقان ۇيلەردەگى پاتەرلەردىڭ قولجەتىمدىلىگى جوعارى. مىسالى، Flatfy.kz ونلاين- سەرۆيسىنىڭ دەرەگىنە سايكەس، الماتىدا 2020 -جىلى پايدالانۋعا بەرىلەتىن پاتەردىڭ ءبىر شارشى مەترىنىڭ قۇنى 2017 -جىلعى پاتەردەن 42,3 پروتسەنتكە ارزان بولادى. 2019 -جىلى قولدانىسقا بەرىلەتىن پاتەرلەر 13,2 پروتسەنتكە، ال 2018 -جىلى - 11,2 پروتسەنتكە ارزان.

استانادا ءدال وسىلاي بولماق. مۇندا 2017 -جىلعى ۇيگە قاراعاندا كەلەسى جىلى سالىنىپ بىتەتىن ۇيدەن باسپانا الۋ 4,3 پروتسەنتكە، ال ءبىر جىلدان كەيىن سالىناتىن ءۇيدىڭ باعاسى 16,3 پروتسەنتكە تيىمدىرەك بولادى.

بۇل رەتتە، جاڭا سالىنعان ۇيلەردە پاتەر قۇنى ءوسىپ جاتىر: ءبىر جىلدا 5,2 پروتسەنتكە قىمباتتاعان. قازاقستان بويىنشا جاڭا كوپپاتەرلى ۇيدەن باسپانا الۋ باعاسى ورتا ەسەپپەن ءبىر شارشى مەترگە 263,1 مىڭ تەڭگەنى قۇرايدى.

استانادا ءساۋىر ايىنىڭ قورىتىندىسى بويىنشا ورتا ەسەپپەن پاتەردىڭ ءبىر شارشى مەترى 332,7 مىڭ تەڭگەگە دەيىن جوعارىلاعان - ءبىر جىلدا 5,7 پروتسەنتكە وسكەن. وڭتۇستىك استانادا كەرىسىنشە ءبىر جىلدا 4,6 پروتسەنتكە تومەندەپ، ءبىر شارشى مەترى 325,6 مىڭ تەڭگەنى قۇراعان.

2018 -جىلدىڭ قاڭتار- ءساۋىر ارالىعىندا قازاقستاندا 72,9 مىڭ ساتۋ- ساتىپ الۋ مامىلەسى جاسالعان. بۇل كورسەتكىش بىلتىرعىدان 4,5 پروتسەنتكە كوپ.

فوتو: cont.ws