قازاقستان 400 ميلليون دوللارعا جۋىق ءسۇت ءونىمىن شەتەلدەن تاسىعان
بۇل سۇراقتارعا «اتامەكەن» ۇ ك پ ا و ك جانە تاماق ونەركاسىبى دەپارتامەنتىنىڭ ديرەكتورى ەربول ەسەنەيەۆ جاۋاپ بەردى، دەپ حابارلايدى قازاقپارات ءتىلشىسى.
«راسىندا دا، ءسۇت ونەركاسىبىنىڭ بىرنەشە قىرى بار. بىزدە ءسۇت وزەندەرى اعىپ جاتىر دەۋگە ءالى ەرتە. بىرىنشىدەن، بىزدە ستاتيستيكا بويىنشا وبەكتيۆتى دەرەكتەر جوق. ستاتيستيكا بويىنشا ءبىز 6 ميلليون ليترگە جۋىق ءسۇت ءوندىرىپ، ونىڭ 2 ميلليون ليترىن عانا وڭدەيمىز. ياعني، بارلىعى جەكە قوسالقى شارۋاشىلىقتاردا دەپ جازىلادى. شىندىعىندا، بۇل ءسۇت جوق، ەشكىمدى الداۋدىڭ قاجەتى جوق. بۇل بيزنەس ءۇشىن دە، ۇكىمەت ءۇشىن دە جالعان سيگنال. بيىل دا وتكەن جىلدارداعى ءساتسىز تاجىريبەنى قايتالادىق»، - دەدى ەربول ەسەنەيەۆ Jibek Joly تەلەارناسىنىڭ ەفيرىندە.
ونىڭ مالىمەتىنشە، قازاقستان 400 ميلليون دوللارعا جۋىق ءسۇت ءونىمىن شەتەلدەن تاسىعان.
«شيكى ءسۇت، ايراندى ءوز سۇتىمىزدەن جاسايمىز. ءبىراق، بالالار تاعامى، ىرىمشىكتەر، سۇزبە - ءبارى شەتەلدەن كەلەدى. مۇندا، ارينە، مەملەكەتتىك ساياسات ماسەلەسى بار، ويتكەنى بۇل سالانى جەتكىلىكتى قولداپ وتىرعان جوقپىز. ءسۇت سالاسىنا كەلسەك، ءبىز رەسەيمەن سالىستىرعاندا ەكى ەسە از، بەلارۋسپەن سالىستىرعاندا ءتورت ەسە از قولداۋ كورسەتەمىز»، - دەپ اتاپ ءوتتى سپيكەر.
بۇعان دەيىن ەربول ەسەنەيەۆ ازىق-تۇلىكتىڭ قىمباتتاۋىنا جول بەرمەۋ ماقساتىندا قانداي شارالار قابىلداۋ كەرەگىن ايتقان ەدى.
