بيىلعى ءتورت ايدا 400 دەن استام جەتىم بالا قامقورلىققا الىنعان
بۇل تۋرالى «ازاماتتارعا ارنالعان ۇكىمەت» كورپوراتسياسىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
قامقورلىققا الىپ، قورعان بولۋ - جەتىم جانە اتا-انا قامقورلىعىنسىز قالعان بالالاردى اسىراپ الۋ مەن پاتروناتقا الۋدان مۇلىكتىك قۇقىقتارمەن وزگەشەلەنەتىن بالا الۋ فورماسى.
«ەلىمىزدىڭ زاڭناماسى بويىنشا اتا-اناسى باس تارتقان نەمەسە اتا- انا قۇقىعىنان ايىرىلۋ سالدارىنان، سونداي-اق، اتا-اناسى قايتىس بولىپ، جەتىم قالعان بالالار قامقورلىققا الىنادى. كوپ جاعدايدا بالانىڭ تۋىسقاندارى قامقورشى اتانىپ جاتادى، الايدا تۋىستىق قاتىناسى جوق بالالاردى دا الۋعا بولادى» دەلىنگەن حابارلامادا.
بالانى قامقورلىققا الاتىن ازامات مەملەكەتتىك كورپوراتسيانىڭ فرونت-وفيسىنىڭ بىرىنە مىناداي قۇجاتتاردى تاپسىرۋى ءتيىس:
- ءوتىنىش پەن جەكە باسىن كۋالاندىراتىن قۇجات؛
- نەكەدە تۇرعان جاعدايدا جۇبايىنىڭ نوتاريالدى راستالعان كەلىسىمى؛
- قامقورلىققا الۋشىنىڭ (ونىڭ جۇبايىنىڭ) دەنساۋلىق جاعدايى تۋرالى انىقتاماسى؛
- قامقورلىققا الۋشىنىڭ (ونىڭ جۇبايىنىڭ) تابىسى تۋرالى انىقتاماسى؛
- قامقورلىققا الۋشىنىڭ (نەمەسە) جۇبايىنىڭ تۇرعىن ءۇيدى پايدالانۋ قۇقىعىن راستايتىن قۇجاتتارىنىڭ كوشىرمەسى (تۇرعىن ۇيگە مەنشىك قۇقىعى بولماعان جاعدايدا)؛
- بالانىڭ اتا- اناسىز قالعانىن راستايتىن قۇجاتتارى؛
- قامقورلىققا الىناتىن بالانىڭ كەلىسىمى (10 جاسقا تولعان بولسا).
ايتا كەتەيىك، بۇرىن سوتتالعان، تابىسى از نە بولماسا دەنساۋلىق جاعدايى كەلمەيتىن ازاماتتار بالانى قامقورلىققا الا المايدى.
سوڭعى جىلدارى جەتىم نە اتا-انا جىلۋىنسىز قالعان بالالاردى قامقورلىققا الۋ كورسەتكىشىنىڭ وڭ ديناميكاسى بايقالادى. 2017 -جىلى وسى سالادا 1069 مەملەكەتتىك قىزمەت كورسەتىلسە، 2018 -جىلى فرونت- وفيستەر ارقىلى 1600 قىزمەت راسىمدەلگەن.