ەكسترەمالدار كوك- توبەدە 4000 مەتر بيىكتىكتەن سەكىردى
الماتى. قازاقپارات - تانىمال Red Bull Skydive Team اۋە كومانداسىنىڭ اتلەتتەرى كوك- توبە ۇستىندە ۆينگسيۋتپەن سەكىردى. بۇل - قالا ۇستىندە جاسالعان العاشقى ۆينگسيۋت- سەكىرۋ، دەپ حابارلايدى قازاقپارات ءتىلشىسى.
كوماندا قازاقستانعا العاش رەت 2017 -جىلى كەلگەن. سول ۋاقىتتا اتلەتتەر بەيس- دجامپ جاساپ، نۇر- سۇلتان قالاسىنىڭ اسپانىنان سەكىردى. الماتىعا كەلگەن ماركو ۆالتەنشپيل، ماركو فيۋرست جانە دانيەل دە لا بلانكا ەسىمدى ەكسترەمالداردى تەڭىز دەڭگەيىنەن بيىكتە ورنالاسقان كوك- توبە تەلەمۇناراسى قىزىقتىردى. جوبا ءبىر جارىم اي دايىندالدى. اتلەتتەردى ءبىزدىڭ ەلدىڭ تابيعاتى باۋراپ الدى. قار جامىلعان تاۋ شىڭدارى سپورتشىلاردى بەيجاي قالدىرمادى. سوندىقتان، قازاقستاندا ەكسترەمالدى سپورتتىق سەكىرۋ كوزدەلگەن.
«ءبىز نۇر- سۇلتاندا بىرنەشە جىل بۇرىن بولعانبىز، سول كەزدە اۋە سپورتى ءۇشىن ەلدىڭ الەۋەتى جوعارى ەكەنىن بايقادىق. قازاقستانعا قايتىپ كەلۋ تۋرالى شەشىم قابىلدادىق. جوباعا الماتىنى تاڭدادىق. ءبىز ۇشۋ ءۇشىن بىرنەشە جەردى قاراستىرعانبىز. ونىڭ ىشىندە ۇلكەن الماتى كولى مەن تەلەمۇنارا بولدى. كوك- توبەنى تاڭدادىق. ارينە، تاۋلاردى قوسپاعاندا قالانىڭ ەڭ بيىك نۇكتەسى وسى جەر ەكەنىن انىقتادىق. جوبامىزدىڭ يدەياسى وسىلاي پايدا بولدى. ءبارى ءساتتى ءوتتى، كەرەمەت اسەر الدىق» ، - دەيدى سپورتشى ماركو ۆالتەنشپيل.
شەتەلدىك سپورتشىلاردىڭ اسپاندا قالىقتاۋى الماتى قالاسىنىڭ بارلىق جاۋاپتى قىزمەتتەرىنىڭ كەلىسىمىمەن 18-20 ماۋسىم ارالىعىندا ءوتتى. ا ن-2 ۇشاعى اتلەتتەردى بۋتاكوۆكا شاتقالىندا ورنالاسقان، 4000 مەترگە جۋىق بيىكتىكتە بەلگىلەنگەن لاقتىرۋ نۇكتەسىنە جەتكىزدى. سپورتشىلاردىڭ ۆينگسيۋتتا اۋەدە ۇشۋى شامامەن ەكى مينۋتقا سوزىلدى. اتلەتتەر كوك- توبە تەلەمۇناراسىنان 220 مەتر بيىكتىككە قوندى. بۇل بىرەگەي سەكىرۋدى ىسكە اسىرۋعا جانە بارلىق ۇيىمداستىرۋ ماسەلەلەرىن شەشۋگە Red Bull Skydive كومانداسى، Visit Almaty كومپانياسى، الماتى قالاسىنىڭ اكىمدىگى جانە الماتى قالاسىنىڭ تۋريزم باسقارماسى كومەكتەستى.
«مەن قازاقستاندا وسىنداي بيىك تاۋلار بار ەكەنىن بىلمەدىم. اسىرەسە، تاۋدىڭ اراسىنان كول كورەمىن دەپ ويلامادىم. تىلسىم تابيعاتتىڭ كەرەمەتىنە تاڭداي قاقتىم. ءبىز تاۋدا سەكىرۋ ءۇشىن قانشاما مۇمكىندىك بار ەكەنىن كوردىك. سوندىقتان، وسى جەرگە قايتا ورالۋدى جوسپارلاپ وتىرمىز» ، - دەدى ماركو فيۋرست.
Red Bull Skydive Team اۋە اكروباتتارى 2012 -جىلدان باستاپ باتىل سەكىرۋلەرىمەن جانە وزىندىك يدەيالارىمەن تاڭ قالدىرىپ كەلەدى. ءدال وسى كوماندا 2015 -جىلى 4000 م بيىكتىكتە ۇشىپ بارا جاتقان تىكۇشاقتان يندونەزيالىق جانارتاۋعا سەكىرگەن بولاتىن. 2016 -جىلى اتلەتتەر بىرنەشە ءجۇز مەتر بيىكتىكتە پاراشيۋتكە ىلىنگەن اتكەنشەكتى تەپكەن بولاتىن. كوماندادا اەرواكروباتيكا بويىنشا كوپتەگەن رەكوردتار بار.
ۆينگسيۋت «كوستيۋم- قانات» دەگەن ماعىنا بەرەدى، ونى كەيدە «ۇشاتىن ءتيىن» دەپ تە اتايدى. بۇل - اۋە اكروباتيكاسىنا ارنالعان كاسىبي كوستيۋم.