400 مىڭداي ادام بۋكمەكەرلەر مەن كازينولاردىڭ تۇراقتى كليەنتىنە اينالعان — دەپۋتات
استانا. KAZINFORM — اجىراسۋلاردىڭ 40 پايىزىنا لۋدومانيا تىكەلەي سەبەپ بولدى. بۇل تۋرالى پارلامەنت ماجىلىسىندە ويىن بيزنەسى تۋرالى زاڭ جوباسىن تانىستىرۋ كەزىندە ءماجىلىس دەپۋتاتى ەلنۇر بەيسەنبايەۆ ايتتى.
«ماسەلەن، بىلتىر بۋكمەكەرلىك كەڭسەلەردىڭ جىلدىق اينالىمى بەيرەسمي اقپاراتتار بويىنشا 1 تريلليون تەڭگەگە جەتكەن. قازىر قۇمار ويىندارى جىلجىمايتىن مۇلىك نارىعىن باسىپ وزىپ، الدىڭعى ورىنعا شىققان. سوندىقتان وسىناۋ زاڭ جوباسى وتە وزەكتى ءارى قوعام ءۇشىن ماڭىزدى ەكەنى انىق. بۇل ماسەلەنى ەل پرەزيدەنتى قاسىم-جومارت توقايەۆتىڭ ءوزى بىرنەشە رەت كوتەرىپ، ناقتى تاپسىرما بەردى. قاۋىپسىزدىك كەڭەسىنىڭ وتىرىسىندا دا، ۇلتتىق قۇرىلتايدا بىرنەشە رەت ەرەكشە توقتالعانىن جاقسى بىلەسىزدەر. شىنى كەرەك، قازىرگى تاڭدا قازاقستاندا ويىنقۇمارلىق ىندەتتەي ءورشىپ، ەل قاۋىپسىزدىگىنە قاتەر توندىرە باستادى. ونىڭ باستى سەبەبى — قۇمار ويىندارىنىڭ جۇرتشىلىققا وڭاي قولجەتىمدى بولۋى جانە ونى ۇيىمداستىرۋشىلاردىڭ ينتەرنەتتەگى سايتتارىنىڭ كەڭىنەن تارالۋى. دەرەكتەرگە جۇگىنسەك، كەيىنگى ەكى جارىم جىلدا ەلىمىزدىڭ ءاربىر بەسىنشى ادامى ويىن وينايدى ەكەن نەمەسە قۇمار ويىندارىنا قانداي دا ءبىر قاتىسى بار. 400 مىڭداي ادام ويىنعا سالىنىپ، بۋكمەكەرلىك كەڭسەلەر مەن كازينولاردىڭ تۇراقتى كليەنتىنە اينالعان»، - دەدى ءماجىلىس دەپۋتاتى ەلنۇر بەيسەنبايەۆ.
ونىڭ ايتۋىنشا، اجىراسۋلاردىڭ 40 پايىزىنا وسى لۋدومانيا تىكەلەي سەبەپ بولدى. تۇرمىستىق زورلىق-زومبىلىققا باراتىنداردىڭ دەنى - وسى قۇمار ويىنعا شالدىققاندار.
«ماسەلەن، 2022-جىلى ەلىمىزدە 3 مىڭ 676 ادام وزىنە قول جۇمساپ، ولاردىڭ ءاربىر بەسىنشىسىنىڭ سەبەبى - لۋدومانيا. وكىنىشكە قاراي، بۇل دەرت قازىر اسكەردە دە كەڭ ەتەك العان. بۇرىن ساربازدار اراسىندا الىمجەتتىك بار بولعانىمەن، سۋيتسيد وتە سيرەك كەزدەسەتىن. قازىر الىمجەتتىك ازايعانىمەن، ساربازداردىڭ وزىنە قول جۇمساۋى جيىلەپ كەتتى. ولاردىڭ كوبى قۇمار ويىننىڭ شىرماۋىنان شىعا الماي، وسىنداي جانتۇرشىگەرلىك قادامعا بارىپ جاتىر. سونىمەن قاتار قىلمىس جاسايتىنداردىڭ 20 پايىزى لۋدوماندار ەكەنى بەلگىلى بولدى. ولار باسكە تىگەتىن اقشا تابۋ ءۇشىن الدىمەن قارىز الادى، سودان سوڭ ۇرلىق، توناۋ سەكىلدى قىلمىستارعا بارادى ەكەن. وسىلايشا، لۋدومانيا 21-عاسىر دەرتىنە اينالىپ وتىر. ءتىپتى مەكتەپ وقۋشىلارى دا ويىنعا قاتىسىپ، ءباس تىگە باستادى. ولاردىڭ ەرەسەك تۋىستارىنىڭ اتىنان تىركەلىپ، ويناۋ فاكتىلەرى جيىلەپ كەتتى. ماسەلەن، شامامەن ەلىمىزدەگى ءاربىر بەسىنشى جاس بۋكمەكەرلىك كەڭسەلەردە ءباس تىگەدى. بۇل دەگەنىڭىز، ءبىر ميلليوننان استام جاس كەمىندە بىرنەشە رەت قۇمار ويىنعا ءباس تىككەن دەگەن ءسوز»، - دەدى دەپۋتات.
ونىڭ سوزىنە قاراعاندا، بۇرىن ويىن اۆتوماتتارىمەن ويناسا، ەندى ونىڭ بارلىعى ونلاينعا كوشتى. بالا كەزىنەن قۇمار ويىنىنا ءۇيىر بولعان بالالار وسە كەلە وعان ءبىرجولا تاۋەلدى بولىپ جاتىر. ونىڭ سوڭى قارىزعا كىرۋگە، سۋيتسيدكە، اجىراسۋعا جانە ماسكۇنەمدىككە اكەلەدى. اقىر سوڭىندا بۇل جەكە ادامنىڭ عانا ەمەس، وتباسىنىڭ، بۇكىل قوعامنىڭ پروبلەماسىنا اينالدى.
