قۇقىقتىق ءتارتىپ شاراسى: 4 كۇندە ىزدەۋدە جۇرگەن 65 قىلمىسكەر ۇستالدى
باسپا ءسوز مالىمەتتەرىنە قاراعاندا، اعىمداعى جىلعى 1-5 -ماۋسىم ارالىعىندا قوعامدىق جانە جول قاۋىپسىزدىگىن، كوشەلەردە جانە باسقا دا قوعامدىق ورىنداردا قىلمىستاردىڭ الدىن الىپ، جالپى قۇقىقتىق ءتارتىپتى قامتاماسىز ەتۋ ماقساتىندا ەل اۋماعىندا «قۇقىقتىق ءتارتىپ» جەدەل الدىن الۋ شاراسى وتكىزىلۋدە.
ونىڭ ەڭ باستى مىندەتى - قىلمىستاردى ءىزىن سۋىتپاي اشۋ، قۇقىقبۇزۋشىلىقتاردى، سونىڭ ىشىندە جول ەرەجەسىن ورەسكەل بۇزۋشىلىقتاردىڭ الدىن الۋ.
وپەراتسيا باستالعان ساتتەن پوليتسيا قىزمەتكەرلەرى 1200 قىلمىستى ءىزىن سۋىتپاي اشتى، سونىڭ ىشىندە ەرتەرەكتە جاسالعان 384 قىلمىس، ناقتىراق ايتقاندا 4 كىسى ءولتىرۋ جانە 32 توناۋ قىلمىسى انىقتالدى. شارا بارىسىندا ىزدەۋدە جۇرگەن 65 قىلمىسكەر ۇستالدى، ونىڭ 15 ىنە وتكەن جىلدارى ىزدەۋ جاريالانعان بولاتىن.
سونىمەن بىرگە 36 اكىمشىلىك قۇقىقبۇزۋشىلىق انىقتالدى. سونىڭ ىشىندە ۇساق بۇزاقىلىق، ىشىمدىك ءىشۋ جانە قوعامدىق ورىنداردا ماس كۇيىندە ءجۇرۋ، ماس كۇيىندە اۆتوكولىك باسقارۋ، جىلدامدىقتى شامادان تىس ارتتىرۋ، تەمىرجول وتكەلدەرىنەن ءوتۋ ەرەجەسىن ساقتاماۋ، ەلىمىزدە بولۋ ءتارتىبىن بۇزۋ سياقتى قىلمىستار تىركەلدى.
پوليتسيا قىزمەتكەرلەرى سونداي-اق، ەسىرتكى زاتتارىن زاڭسىز ساقتاۋدىڭ 91 فاكتىسىن انىقتادى، 40 كەلى ەسىرتكى تاركىلەدى، سونداي-اق زاڭسىز ساقتالعان 92 دانا اتىس قارۋى الىندى. ونىڭ 69 ى تەگىس ۇڭعىلى، 16 سى تراۆماتيكالىق نەمەسە گازدى قارۋلار.
جالپى، «قۇقىقتىق ءتارتىپ» جەدەل الدىن الۋ شاراسى كەزىندە قالالار مەن ەلدىمەكەندەر كوشەلەرىندە، قوعامدىق ورىنداردا جەدەل جاعدايدىڭ جاقسارعانى بايقالدى.
