مينيستر «بەك ەير» ۇشاعىنىڭ اپاتقا ۇشىراۋىنىڭ 3 نۇسقاسىن اتادى

«قازىرگى ۋاقىتتا وقيعاعا قاتىستى تەرگەۋ جۇرگىزىلىپ جاتىر. تەرگەۋگە سايكەس ءۇش نۇسقامىز بار. ءبىرىنشىسى - ۇشاق ەكيپاجىنىڭ قاتەلىگى. ەكىنشى - ۇشاقتاعى تەحنيكالىق اقاۋ. ءۇشىنشى - اۋەجايدىڭ ناۆيگاتسيالىق قىزمەتىنىڭ قاتەلىگى. بۇگىندە 5-6 تەحنيكالىق ساراپتاما جۇرگىزىلۋ ۇستىندە. ۇشاقتى جاساعان زاۋىتتان ماماندار كەلدى. ولار ءبىزدىڭ ساراپشىلارمەن بىرلەسىپ جۇمىس ىستەپ جاتىر. ساراپتامالار بىتكەننەن كەيىن ناتيجەسىن ايتامىز»، - دەدى مينيستر ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ ايتۋىنشا، ۇشاقتىڭ ەكىنشى ۇشقىسى، ءبىر بورتسەرىك قازىرگى ۋاقىتتا اۋرۋحانادا رەانيماتسيادا جاتىر. ال قالعان 2 بورتسەرىك ۇشاقتىڭ ارتقى بولىگىندە وتىرعاندىقتان امان قالدى.

ەسكە سالساق، 27 -جەلتوقساندا الماتىدان نۇر-سۇلتان قالاسىنا ۇشىپ شىققان ۇشاق راداردان جوعالىپ كەتتى.

كەيىن 95 جولاۋشىسى جانە 5 ەكيپاج مۇشەسى بار ۇشاقتىڭ اپاتقا ۇشىراعانى ءمالىم بولدى.

وقيعانىڭ ءمان-جايىن انىقتاۋ ءۇشىن ۇشاق قۇلاعان اۋماققا ارنايى كوميسسيا ۇشىپ شىقتى.

ق ر پرەزيدەنتى قاسىم-جومارت توقايەۆ ۇشاق اپاتىنا كىنالىلەر زاڭعا سايكەس قاتاڭ جازالاناتىنىن مالىمدەدى.

ەلباسى نۇر- سۇلتان نازاربايەۆ جولاۋشىلار ۇشاعىنىڭ اپاتقا ۇشىراۋىنا بايلانىستى كوڭىل ايتتى.

اۆتور: مارلان جيەمباي