جوتەلدى پيازبەن ەمدەۋدىڭ 3 ءادىسى
سەبەبى پيازدىڭ قۇرامىندا باكتەريالارمەن كۇرەسەتىن بيولوگيالىق بەلسەندى زاتتار بار. تۇماۋدان جانە جوتەلدەن تەز جازىلۋعا كومەكتەسەتىن پيازدان جاسالاتىن قۇرالداردىڭ رەتسەپتىلەرىن ۇسىنامىز.
1-رەتسەپت. ءبىر پيازدى ۇساقتاپ تۋراپ، كىشكەنتاي قۇتىعا سالىڭىز. ونىڭ ۇستىنە 2 اس قاسىق قانت سالىڭىز. قۇتىنىڭ قاقپاعىن جاۋىپ، قاراڭعى جەرگە 2 ساعاتقا قويىڭىز. سول كەزدە پيازدىڭ سۋى شىعادى. وعان قانت قوسقاندىقتان پيازدىڭ اشى ءدامىن ءسال باسادى. دايىن ءشارباتتى جوتەل كەزىندە ەرەسەكتەر كۇنىنە اس قاسىقپەن 3 رەت، ال بالالار شاي قاسىقپەن 3 رەت ءىشۋ كەرەك. بۇل ءشارباتتى ۇزاق ساقتاۋعا بولمايدى. سوندىقتان 1 شاعىن پيازدان دايىنداپ، ول تاۋسىلعاننان كەيىن عانا كەلەلسى ءشارباتتى جاساڭىز.
2-رەتسەپت. جوتەل كەزىندە اتا- انالار بالالارعا جىلى سۇتكە سارى ماي سالىپ بەرەدى. ءبىراق ەگەر جوتەل ۇلعايىپ كەتكەن بولسا، سۇتكە پياز قايناتىپ بەرگەن ءجون. ول ءۇشىن 1 كەسە سۇتكە جارتى پيازدى سالىپ، 3-4 مينۋت قايناتۋ كەرەك. سودان سوڭ ءسۇتىن ءسۇزىپ الىپ، ءىشۋ كەرەك. ونى ەرەسەكتەرگە دە، بالالارعا دا بەرۋگە بولادى. مۇنداي ءسۇتتى كۇنىنە 2-3 رەت ىشكەن دۇرىس.
3-رەتسەپت. جوتەلگە جانە تۇماۋعا قارسى تاعى ءبىر قۇرال - پياز سۋى مەن بال قوسپاسى. ونى دايىنداۋ ءۇشىن ءبىر پيازدى ۇساقتاپ تۋراپ، داكەگە سالىپ، سۋىن شىعارىپ الاسىز. 1 پيازدان شامامەن جارتى كەسە نەمەسە ودان ءسال ازداۋ شىرىن شىعادى. سوعان 1 اس قاسىق تابيعي بال سالىپ ارالاستىراسىز. وسى قوسپانى 1 شاي قاسىقتان كۇنىنە 3 رەت جەۋ كەرەك.
پيازدى قاي ۋاقىتتا قولدانۋعا بولمايدى؟ بالانىڭ پيازعا جوعارى سەزىمتالدىعى بولماعان جاعدايدا عانا ودان جاسالعان ەمدىك قۇرالداردى بەرۋگە بولادى.
اللەرگيا بولۋ قاۋپى جوعارى بولعاندىقتان پياز بەن بال قوسپاسىن 3 جاستان تومەن بالالارعا بەرۋ ۇسىنىلمايدى. مۇنداي ءدارىنى بالاعا ءبىرىنشى رەت بەرگەندە از- ازدان ۇسىنۋ كەرەك. مىسالى، باستاپقىدا تەك قاسىقتىڭ ۇشىمەن عانا بەرىڭىز. بالا اسقازانى تىتىركەنبەس ءۇشىن بۇل دارىلەردەن سوڭ مىندەتتى تۇردە سۋ ىشكىزىڭىز.
ال ەرەسەكتەردە پيازعا نەمەسە بالعا اللەرگيا بولسا جانە اسقازان- ىشەك جولى اۋرۋلارى بولسا، پيازدان جاسالعان دارىلەردى ءىشۋ ۇسىنىلمايدى. پيازدان جاسالاتىن ەمدىك قۇرالدار تۇماۋدى جانە جوتەلدى جىلدام كەتىرۋگە كومەكتەسەدى. الايدا، ونى ءىشۋ مولشەرىن دۇرىس ساقتاۋ كەرەك. سونىمەن قاتار، ونى بالاعا بەرەردە دارىگەرمەن اقىلداسىپ العان ءجون.