تۇركىستان وبلىسىنىڭ ديقاندارى كوكونىستەن 3 رەت ءونىم الۋدى جوسپارلاپ وتىر
جەردىڭ بابىن تاۋىپ، اۋا رايىنىڭ قولايلى كەزىندە ىسكە كىرىسكەن مىنا ارىستىق ديقاندار بيىل 5 گەكتار جەرگە قىرىققابات ەككەن. ناۋرىز ايىندا وتىرعىزىلعان كوكونىس قازىر ءتۇيىن بايلاپ، جايقالىپ تۇر.
«كوكتەمگى العاشقى ونىمگە ادەيى قىرىقاباتتى وتىرعىزامىز. ويتكەنى ول ەرتە كوكتەمدەگى سۋىققا ءتوزىمدى كەلەدى» - دەيدى شارۋالار. 70 كۇندە پىسەتىن قىرىققاباتتى ماۋسىمنىڭ ورتاسىندا جيناپ الادى. ودان كەيىن ەكىنشى كەزەڭدە قيار مەن قىزاناق كوشەتىن وتىرعىزادى. قيار 40 كۇندە، قىزاناق 50 كۇندە پىسەدى. ونى تەرىپ العاننان كەيىن تامىز ايىندا جەردى قايتا قوپسىتىپ، جۇگەرىنىڭ ءدانىن سەبەدى. قازان ايىندا جۇگەرى دە ءوسىپ جەتىلەدى.
كەنجەبەك ءابدىرايىموۆ، كووپەراتيۆ ءتوراعاسى:
- العاش رەت ەگىپ وتىرمىز. بۇرىن ەكى ءونىم الاتىنبىز، ءبىراق ءۇش ءونىم الىپ كورمەدىك. ەندى ءۇشىنشى ونىمگە ۇلگەرۋگە بولادى. جۇگەرىنى ءبىز ەندى ءپىسىرىپ المايمىز. بورداقىلاپ وتىرعان مالدارىمىز بار، سوعان سيلسكە ورىپ الامىز. وسىلايشا ءۇش ءونىمدى قازان ايىنا دەيىن جيناپ، تەرىپ الامىز دەگەن ماقساتىمىز بار.
«ءبىر ماۋسىمدا جەردەن ءۇش رەت ءونىم جيىپ الۋ اگرارلىق سالا ءۇشىن دە، شارۋاعا دا ءتيىمدى» - دەيدى ماماندار. ويتكەنى ءونىم كولەمى ارتادى. ماقتا ەگۋگە قاراعاندا تابىسى دا 4-5 ەسە ۇلعايادى. بۇل ءادىستى قازىر وبلىستاعى كەلەس، جەتىساي، ماقتاارال جانە ارىس اۋداندارىنىڭ شارۋالارى ءساتتى جۇزەگە اسىرىپ كەلەدى.
تاڭاتار جاقىپبايەۆ، وبلىستىق اۋىل شارۋاشىلىعى باسقارماسىنىڭ باس مامانى:
- ءۇش ءونىم ەككەن جاعدايدا 2 ميلليون تەڭگە قارجى شىعىنداپ، 4,5 ميلليون تەڭگە تابىس تابۋعا بولادى. وتكەن ايدىڭ 20-21 - جۇلدىزىندا سەمينار كەڭەستەر وتكىزىلدى وسى ءۇش ءونىم الۋ جونىندە. كەنتاۋ اۋدانىنىڭ شاعا اۋىلىندا 2 گەكتارعا قىرىققابات ەگىلدى. ودان كەيىن كەلەس اۋدانىنىڭ بىرلەسۋ اۋىلىندا 6 گەكتارعا ءۇش ءونىم الۋ جونىندە تاجىريبە جۇرگىزىلىپ، كوكونىستەر ەگىلدى.
ەندى جاڭاشىل ءادىستى وڭىردەگى تولە بي، ورداباسى اۋداندارى مەن تۇركىستان، كەنتاۋ قالالارىنا دا ەنگىزۋ جوسپارلانىپ وتىر. ول ءۇشىن قازىر ايماقتاعى ديقاندار تىڭ تاجىريبەنى شارۋاشىلىققا بەيىمدەۋ جۇمىستارىن جۇرگىزىپ جاتىر.