قازاقستاندا كەدەندىك باقىلاۋدان 3 مينۋتتا وتۋگە بولادى - فوتو

بەيجىڭ. قازاقپارات - قىتايدا وتكەن جيىندا قازاقستاندىق كەدەن ورگاندارىنىڭ جۇرگىزىپ وتىرعان جۇمىسى تۋرالى ايتىلدى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.

ق ر قارجى مينيسترلىگىنىڭ مەملەكەتتىك كىرىستەر كوميتەتى ءتوراعاسىنىڭ ورىنباسارى عۇسمان ءامرين Nuctech كومپانياسىنىڭ 20 جىلدىعىنا ارنالعان شاراعا قاتىستى.

«بۇل باعىتتاعى ءۇمىت كۇتتىرگەن باستى ناتيجە تەكسەرۋدىڭ قازىرگى جەڭىلدىكتەرىن ساقتاي وتىرىپ، قاۋىپسىزدىك دەڭگەيىن ارتتىرۋ مۇمكىندىگى بولىپ وتىر»، - دەدى عۇسمان ءامرين بەيجىڭدە «Nuctech-2018 قاۋىپسىزدىك جانە تەكسەرۋ تەحنولوگيالارى سالاسىنداعى تەحنولوگيالار» اتتى كونفەرەنسيانىڭ اشىلۋ راسىمىندە.

 

ونىڭ سوزىنە قاراعاندا، ىشكى لوگيستيكانى باقىلاۋ جانە باسقارۋدىڭ ءبىرىڭعاي پلاتفورماسىن جاساۋ جۇيەنىڭ بارلىعىن كەدەندىك باقىلاۋدىڭ ءبىرىڭعاي تەحنولوگيالىق دالىزىنە بىرىكتىرۋگە، قوزعالىستى توقتاتپاۋعا، ۋاقىت شىعىنsy 3 مينۋتتان اسىرماۋعا مۇمكىندىك بەرەدى.

ع. ءامرين بۇعان دەيىن قازاقستاندا قولدانىلىپ كەلگەن كەدەندىك باقىلاۋدىڭ 5 كەزەڭدىك جۇيەسى ايتارلىقتاي قيىندىقتاردى تۋىنداتقانىن ايتتى. ول وسى كەدەرگىلەردى جويۋ باعىتتارداعى جۇمىستاردى جۇرگىزۋدە قازاقستانمەن 15 جىلدان بەرى ىنتىماقتاستىق ەتىپ كەلەتىن Nuctech كومپانياسىنىڭ كومەگى مول ەكەندىگىن ايتتى.

 

ەسكە سالا كەتەيىك، Nuctech كومپانياسى قىتايدىڭ كەدەندىك جانە باسقا دا ۆەدومستۆولارىنا قاۋىپسىزدىك تەحنيكالارىن جەتكىزۋشى. ول سونداي- اق، 122 ەلگە تاۋار ەكسپورتتايدى.

2004 -جىلدان بەرى كومپانيا قازاقستاندا 26 ءىرى گاباريتتى ينسپەكتسيالىق- تەكسەرۋ كەشەنىن، 340 كىشى گاباريتتى تەكسەرۋ جۇيەلەرىن ورناتتى. ولار قازىعۇرت، باقتى، اتامەكەن، تەمىر بابا كەدەن بەكەتتەرىندە، «قۇلان»، «بەينەۋ»، «التىنكول»، «دوستىق» ستانسالارىندا، الماتى، شىمكەنت اۋەجايلارىندا، 16 تەمىرجول ۆوكزالىندا، ەكسپو-2017 نىساندارىندا، بەيبىتشىلىك جانە كەلىسىم سارايىندا، ت. ب. جۇمىس ىستەپ تۇر.