باقىتبەك ەسەنتايەۆقا قاتىستى سوت وتىرىسى 3- قاراشادا جالعاسادى

تالدىقورعان. قازاقپارات - بۇگىن تالدىقورعاندا باقىتبەك ەسەنتايەۆتىڭ ىسىنە بايلانىستى سوت وتىرىسى جالعاستى.

جابىق رەجيمدەگى بۇل جولعى سوت وتىرىسىندا قوس تاراپ جارىسسوزگە شىقتى.

پروتسەسكە بايان ماقسات قىزى دا كەلىپ قاتىستى.

سوتتىڭ جابىق رەجيمدە وتۋىنە بايلانىستى باقىتبەك ەسەنتايەۆقا مەملەكەتتىك ايىپتاۋشى قانداي جازا قولدانۋدى سۇراعانى جونىندە القا بيلەر شەشىم شىعارعانشا جاريا ەتىلمەيدى.

كەلەسى سوت وتىرىسى بەيسەنبى كۇنى 3- قاراشادا جالعاسادى. وعان دەيىن سوتتالۋشى سوڭعى ءسوزىن ايتۋعا، القا بيلەر شەشىم شىعارۋعا دايىندالۋى ءۇشىن ءۇزىلىس جاريالاندى.

ەستەرىڭىزگە سالا كەتەيىك، باقىتبەك ەسەنتايەۆتىڭ سوتى 18- قازاندا باستالدى. العاشقى تىڭدالىمعا قاتىسقان بايان ماقسات قىزى ءوزىنىڭ بۇرىنعى كۇيەۋىن تولىقتاي كەشىرىپ، باس بوستاندىعىنان ايىرماۋدى وتىنگەن ەدى.

باقىتبەك ەسەنتايەۆ زورلىق-زومبىلىق، زورلاۋ فاكتىلەرىنەن وزگە ادام ولتىرۋگە وقتالۋ بابى بويىنشا جاۋاپقا تارتىلۋدا. ەڭ اۋىر باپ تا وسى. قازىرگى تاڭدا زاڭگەرلەردىڭ باسىم بولىگى زورلاۋ، زورلىق-زومبىلىق باپتارى بويىنشا ءىس قىسقارتىلسا دا، ادام ولتىرۋگە وقتالۋ بابى بويىنشا باقىتبەك ەسەنتايەۆ جازاعا تارتىلۋى مۇمكىن دەگەن پىكىرلەرىن بىلدىرگەن ەدى. ءبىراق، بۇل پروتسەستىڭ ءبىر ەرەكشەلىگى سوتقا القا بيلەرى قاتىسۋدا. شەشىمدى القا بيلەر قابىلدايدى.

اۆتور: سامال قابىشەۆا