بوسقىن 3 جاستاعى ءسابيدىڭ ءولىمى ەۋروپانى ءدۇر سىلكىندىردى
Reuters اگەنتتىگىنىڭ فوتوگرافى نيلۋفەر دەمير تۇرىكتىڭ بودرۋم قالاسىنا جاقىن جاعاجايدا جانسىز جاتقان ءۇش جاستاعى ايلان كۋرديدى تۇسىرگەن. بۇل جانتۇرشىگەرلىك وقيعا ەۋروداقتاعى كوشى- قون پروبلەماسى جايلى پىكىرتالاستى ودان ءارى ءورشىتتى.
ءبۇلدىرشىن اكە- شەشەسىمەن، بىرنەشە ونداعان سيريالىق بوسقىندارمەن بىرگە گرەكيالىق كوس ارالىنا جەتپەك بولعان. ءبىراق قايىق اۋدارىلىپ، سالدارىنان 11دەن استام ادام، ىشىندە ايلان، ونىڭ بەس جاستاعى اعاسى گاليپ جانە اناسى اجال قۇشقان.
جاعادا جاتقان بالانىڭ سۋرەتى ەۋروپا ەلدەرىنىڭ بيلىك باسىنداعىلاردان ءوز ەلىندەگى ازاماتتىق سوعىستان قاشقان سيريالىقتارعا كوپتەن بەرى كومەك كورسەتۋدى تالاپ ەتىپ كەلە جاتقان بەلسەندىلەر مەن قۇقىق قورعاۋشىلاردىڭ اشۋ- ىزاسىن تۋعىزدى.
بريتاندىق The Independent گازەتى 2 - قىركۇيەكتەگى رەداكسيالىق ماتەريالىندا وسى ءتۇسىرىلىمدى ءبىرىنشى بەتىندە جاريالاپ، بوسقىندارعا ءتيىستى كومەك كورسەتۋ شارالارىن تالاپ ەتكەن.
«ەگەر وسى سۇمدىق فوتوگرافيا، جاعالاۋعا شىعىپ قالعان سيريالىق بالانىڭ ءولىمى ەۋروپانىڭ بوسقىندارعا دەگەن قاتىناسىن وزگەرتپەسە، باسقا نە وزگەرتە الۋى مۇمكىن؟» دەگەن ساۋال تاستايدى ماقالا اۆتورلارى.