بالالاردى قورعاۋ كۇنىنە وراي «شىمبۇلاقتا» ۇيىمداستىرىلعان مەرەكەگە 3 مىڭعا جۋىق ادام قاتىستى
وعان الدىن الا دەرەكتەر بويىنشا 3 مىڭعا جۋىق ادام قاتىستى. ولاردىڭ تەڭ جارتىسى - بالالار. ۇيىمداستىرۋشىلاردىڭ ايتۋىنشا، كەشكە دەيىن ادامدار سانى ءۇش مىڭنان اسىپ جىعىلۋى مۇمكىن.
«بيىل ون بەس جاسقا دەيىنگى بالالارعا اسپالى جول تەگىن بولدى. وتكەن جىلى ون ءۇش جاسقا دەيىنگى بالالار اسپالى جولمەن تەگىن جۇرگەن بولاتىن. بيىل قالا تۇرعىندارى مەن قوناقتارى جانە بالالار كوپتەپ كەلۋدە. ءبىزدىڭ انيماتور ونەرپازدارىمىز بالالار اراسىندا ءار ءتۇرلى قىزىقتى ويىندار وتكىزىپ جاتىر. جەڭىمپازدار باعالى سىيلىقتارمەن ماراپاتتالادى»، - دەدى ءوز سوزىندە «شىمبۇلاق» تاۋ- شاڭعى شيپاجايىنىڭ ماركەتينگ مەنەدجەرى سايا وقاس.
سونىمەن قاتار، سايا وقاس «شىمبۇلاقتىڭ» جىل ون ەكى اي جۇمىس ىستەيتىندىگىن جانە بيىلعى جازعى ماۋسىمدا كەلۋشىلەر ءۇشىن ءبىرقاتار جاڭا شارالار ۇيىمداستىرىلاتىندعىن جەتكىزدى.
«جالپى، «شىمبۇلاققا» ءبىر جىل ىشىندە جارتى ميلليونداي ادام كەلىپ دەمالادى. ال ولاردىڭ 40 پايىزى جازدا كەلەدى. نەگە؟ ويتكەنى مۇندا بەلسەندى دەمالۋعا ارنالعان ءتۇرلى شارالار ءوتىپ تۇرادى. ولاردىڭ ىشىندە تاۋ ۆەلوسيپەدىمەن، باگگيمەن جارىستار وتەدى. تاۋعا جورىقتار جاسالادى. بيىل تۇڭعىش رەت ماۋسىم ايىنىڭ ورتاسىنان باستاپ، جەكسەنبى سايىن «شىمبۇلاقتا» «تاۋداعى يوگا» شاراسى ۇيىمداستىرىلاتىن بولادى. ودان باسقا، اتى الەمگە تانىمال الپينيست ماقسۇت جۇمايەۆتىڭ جەتەكشىلىگىمەن جازدىڭ باسىنان اياعىنا دەيىن بالالاردىڭ دەمالۋىنا ارنالعان «بالالار پالاتكالىق لاگەرى» قۇرىلادى. وندا بالالار تابيعات اياسىندا، وركەنيەتتىڭ جەتىستىكتەرىنسىز، ياعني ەلەكتر قۋاتىنسىز، جارىقسىز ءومىر سۇرۋگە، تابياتتى ايالاي بىلۋگە ۇيرەنەدى. ال بەلگىلى سيرك ءارتىسى مۇرات مۇتىرعانوۆ كەلىپ، ولارمەن ماماندىق تاڭداۋ بويىنشا دارىستەر وتكىزەدى»، - دەدى س. وقاس.
ايتا كەتىلىك، بۇگىن ىلە الاتاۋ ۇلتتىق ساياباعىندا «شىمبۇلاق» تاۋ-شاڭعى كۋرورتى مەن «اسسورتي» مەيرامحانالار جەلىسىنىڭ ۇيىمداستىرۋىمەن «تازا تاۋلار» شاراسى ۇيىمداستىرىلدى. وندا 500 استام قالا تۇرعىندارى مەن قوناقتارى جانە باسقا دا ەرىكتىلەر تاۋ شاتقالدارىن قوقىستان تازارتاۋ جۇمىستارىن جۇرگىزدى.
شىنىندا دا بۇگىن «شىمبۇلاققا» كەلگەن بالالاردىڭ قۋانىشتارىندا شەك بولمادى. انيماتورلار ۇيىمداستىرعان ءتۇرلى ويىندارعا قاتىسىپ ءماز- مەيرام بولىستى. بارلىعىنا سىيلىقتار ۇلەستىرىلدى.
اۆتور: جاپپاربەرگەن ايبوتا