ەڭبەك ءوتىلى - 390 جىلعا تولعان اسانوۆتار اۋلەتىن «سامۇرىق- قازىنا» ماراپاتتادى

 استانا. قازاقپارات - بۇگىن «سامۇرىق- قازىنا» ا ق ەڭبەك اۋلەتتەرى كۇنىن اتاپ ءوتتى. شارا اياسىندا ەلىمىزدىڭ ءار تۇكپىرىندەگى قوردىڭ ەنشىلەس كومپانيالارىندا قىزمەت ەتىپ جۇرگەن ەڭبەك اۋلەتتەرىنىڭ وكىلدەرى مەدالدارمەن، قۇرمەت گراموتالارىمەن ماراپاتتالدى.

 ولاردىڭ قاتارىندا اسانوۆتار اۋلەتىن ەرەكشە اتاپ وتۋگە بولادى. بۇل اۋلەتتەن تاراعان 18 جان ەلىمىزدىڭ ءار تارابىنداعى تەمىر جولدا قىزمەت اتقارىپ ءجۇر. ولاردىڭ تەمىر جول سالاسىنداعى جالپى ەڭبەك ءوتىلى - 390 جىل.

سونداي- اق، بيجانوۆتار اۋلەتىنىڭ كەنىشتەگى جالپى ەڭبەك ءوتىلى - 163 جىلدى قۇرايدى. اۋلەتتىڭ نەگىزىن قالاعان ءالىم بيجان ۇلىنان تاراعان ءۇش بۋىن «ماڭعىستاۋ مۇنايگاز» اكسيونەرلىك قوعامىندا ەڭبەك ەتەدى. بۇل مۇنايشىلار وتباسى كەن ورنىن بارلاۋدان باستاپ، توپىراقتى كومىرسۋتەگىنەن تازارتۋعا دەيىنگى بارلىق كۇردەلى جۇمىستى ءمىنسىز اتقارىپ كەلەدى. سونىمەن قاتار، اتىراۋ وبلىسىنان كەلگەن ساعىندىقوۆ- ماقۇلوۆتار وتباسى دا ماراپاتقا يە بولدى. ولاردىڭ اۋلەتىنىڭ بايلانىس سالاسىنداعى جالپى ەڭبەك ءوتىلى 111 جىلدى قۇراعان. وسى ىستەپتەس باسقا دا ەڭبەك اۋلەتتەرى نازاردان تىس قالمادى.

 «سامۇرىق- قازىنا» ا ق قوعاممەن بايلانىس ءبولىمىنىڭ ديرەكتورى دارحان قالەتايەۆتىڭ ايتۋىنشا، قازىر كومپانيالار توبىندا كەڭ كولەمدى ترانسفورماتسيا باعدارلاماسى ءجۇرىپ جاتىر.

«وسى تۇبەگەيلى وزگەرىستەردىڭ ءتۇپ باستاۋىندا سىزدەر، مەرەيلى ەڭبەك اۋلەتتەرى، تۇرارىنا سەنىمدىمىن. ويتكەنى، وزگەرىستەرگە بەيىمدەلىپ، جيناقتالعان ءبىلىم مەن بىلىكتى جاڭا تاجىريبەمەن تولىقتىرا ءتۇسۋ قابىلەتى سالاداعى ۇرپاق ساباقتاستىعىن ساقتاۋعا سەپتىگىن تيگىزەدى»، - دەپ اتاپ ءوتتى ول.

 اۆتور: ءابۋ- اسقار مەكەش ۇلى