وڭتۇستىك كورەيا ۇكىمەتى ۋحاننان 367 ازاماتىن ەلگە قايتاردى

نۇر-سۇلتان. قازاقپارات - وڭتۇستىك كورەيا ۇكىمەتى ءوز ازاماتتارىن قىتايدىڭ ۋحان قالاسىنان قايتاردى، دەپ حابارلايدى «حابار 24».

تاڭ اتا سەۋلدىڭ كيمپو اۋەجايىنا چارتەرلىك رەيسپەن 367 ادام جەتكىزىلدى.

تىزىمدەگى ءبىر ازامات قالىپ قويدى، سەبەبى ودان ىندەت ءىزى بايقالعان. ورالعاندار ەندى ەكى اپتا بويى كارانتيندە بولادى، ويتكەنى كورناۆيرۋس بەلگىلەرى ون ءتورت كۇن ىشىندە بايقالۋى مۇمكىن.

قازىر وڭتۇستىك كورەيادا ىندەت جۇقتىردى دەگەن جەتىنشى جاعداي تىركەلدى. كورەيالىق اۋرۋلاردى باقىلاۋ جانە الدىن الۋ ورتالىعىنىڭ حابارلاۋىنشا، 28 جاستاعى ەر ادام ناۋقاسقا شالدىققان. ول ۋحاننان ۇيگە 23 - قاڭتاردا ورالىپتى. ءبىراق ول كەزدە ۆيرۋستىڭ بەلگىلەرى بولماعان. تەك ءۇش كۇننەن كەيىن تۇماۋ بەلگىلەرى مەن جوعارى تەمپەراتۋراسى انىقتالدى.

وڭتۇستىك كورەيادا كورونوۆيرۋستىڭ ادامنان ادامعا جۇعۋى دەرەگى تىركەلدى. دارىگەرلەر 56 جاستاعى ەر ادام سەۋل مەيرامحاناسىندا تۇسكى استان كەيىن جۇقتىردى دەپ بولجايدى. ءدال سول ۋاقىتتا ۋحان كوروناۆيرۋسىن جۇقتىرعان كىسى تۇستەنگەن. ەلگە ەندى اكەلىنگەن 367 ادامنىڭ بارلىعى ەلوردادان 90 شاقىرىم قاشىقتىقتا ورنالاسقان اسان جانە چينچون قالالارىندا ارنايى دايىندالعان ەكى ەمحانادا ورنالاستى. وعان جەرگىلىكتى تۇرعىندار نارازىلىق ءبىلدىردى. جاعدايدى تۇسىندىرۋگە كەلگەن ۇكىمەت دەلەگاتسياسىنا جۇمىرتقا لاقتىرعان.

وڭتۇستىك كورەيا 700-گە جۋىق ازاماتىن ەۆاكۋاتسيالاۋ جوسپارلاپتى، ءبىراق قىتايدا ازىرگە تەك ءبىر رەيستى قابىلداۋعا عانا كەلىستى.

لي تە حو، كورەيا رەسپۋبليكاسىنىڭ سىرتقى ىستەر مينيسترلىگىنىڭ ۆيتسە- ءمينيسترى:

- ازىرگە بىزدە تەك ءبىر رەيسكە رۇقسات بار، ءبىراق قالعان ءبىر نەمەسە ەكى رەيس ءۇشىن ناقتى جاۋاپتار جوق. ءبىز بۇل ماسەلەنى قىتايلىق ارىپتەستەرىمىزبەن ۇنەمى تالقىلاپ وتىرامىز.

www.24.kz