360 مەترلىك الىپ: گەرمانيادا الەمدەگى ەڭ بيىك جەل تۋربيناسى سالىنىپ جاتىر
استانا. KAZINFORM - گەرمانياداعى شاعىن قالاشىقتاردىڭ بىرىندە الەمدەگى ەڭ بيىك جەل تۋربيناسى كوككە بوي كوتەرىپ كەلەدى.
بيىكتىگى 360 مەتر بولاتىن بۇل نىسان جاڭا تەحنولوگيالاردىڭ ەۋروپاداعى جەل ەنەرگەتيكاسىن قالاي ءتيىمدى ەتە الاتىنىن كورسەتۋگە ارنالعان. بۇل تۋرالى Euronews جازدى.
گەرمانيانىڭ براندەنبۋرگ جەرىندەگى شاعىن Schipkau قالاشىعىندا ناۋرىز ايىندا ەرەكشە قۇرىلىس الاڭىنداعى جۇمىستار قايتا جانداندى. قۇرىلىس جوسپارعا ساي اياقتالسا، مۇندا الەمدەگى ەڭ بيىك جەل تۋربيناسى سالىنادى، دەپ حابارلايدى GICON قۇرىلىس كومپانياسى. ىرگەتاس پليتاسىنان باستاپ روتور ۇشىنا دەيىنگى بيىكتىگى شامامەن 360 مەتر بولادى.
بۇل كورسەتكىش تۋربينانى گەرمانياداعى بيىكتىگى 368 مەترلىك Berlin TV Tower نىسانىنان كەيىنگى ەكىنشى ەڭ بيىك قۇرىلىسقا اينالدىرادى. GICON كومپانياسىنىڭ مالىمدەۋىنشە، بۇل بيىك جەل تۋربيناسى ەنەرگيامەن قامتۋ جۇيەسىنىڭ تاۋەلسىزدىگىن ارتتىرۋعا ىقپال ەتەدى.
درەزدەندەگى ينجەنەرلىك قىزمەت كورسەتۋشى GICON ۇسىنعان كورسەتكىشتەرگە كوز جۇگىرتسەك: حاب بيىكتىگى - 300 مەتر، جىلدىق بولجامدى ەلەكتر ەنەرگياسىن ءوندىرۋ كولەمى - 30-33 گيگاۆاتت- ساعات، ال ەلەكتر ەنەرگياسىن ءوندىرۋ قۇنى - كيلوۆاتت- ساعاتىنا 5 سەنتتەن تومەن.
كومپانيا دەرەگىنشە، بۇل كولەم ءتورت ادامنان تۇراتىن شامامەن 7500 ءۇي شارۋاشىلىعىن ەلەكتر قۋاتىمەن قامتاماسىز ەتۋگە جەتەدى. 3 - ناۋرىزداعى باسپاءسوز حابارلاماسىندا GICON Schipkau Wind Farm جەل پاركىنىڭ ماڭىنداعى كادىمگى تۋربينالارمەن سالىستىرعاندا ەلەكتر ءوندىرۋ كولەمى 220 پايىزعا دەيىن ارتاتىنىن مالىمدەدى.
مۇنىڭ فيزيكالىق نەگىزى تۇسىنىكتى: جەل تۋربيناسى نەعۇرلىم بيىك ورناتىلسا، سوعۇرلىم كۇشتىرەك ءارى تۇراقتى جەل اعىنىن ۇستايدى.
2010 -جىلدان بەرى وسى تەحنولوگيامەن اينالىسىپ كەلە جاتقان GICON بۇل بولجامدى عىلىمي تۇرعىدا دالەلدەۋدى ماقسات ەتكەن. beventum GmbH كومپانياسىنىڭ، ياعني SPRIND اگەنتتىگىنىڭ ەنشىلەس كاسىپورنىنىڭ تاپسىرىسى بويىنشا كومپانيا كورشىلەس Klettwitz ەلدى مەكەنىندە جەلدى ولشەيتىن دىڭگەك ورناتقان.
زەرتتەۋ ناتيجەسى 300 مەتر بيىكتىكتە جەلدىڭ ادەتتەگى دەڭگەيلەرگە قاراعاندا راسىندا دا تۇراقتى ءارى كۇشتى سوعاتىنىن كورسەتتى.
مۇنداعى نەگىزگى تەحنيكالىق ماسەلە - تۋربينانى وسىنداي بيىكتىككە قالاي كوتەرۋ بولىپ وتىر. بۇل جەردە كادىمگى كرانداردىڭ شاماسى جەتپەيتىندىكتەن، كومپانيا پاتەنتتەلگەن تەلەسكوپيالىق قۇرىلعىنى قولدانۋدى جوسپارلاپ وتىر. ياعگي جوبالىق قۇجاتتارعا سايكەس، تۋربينا الدىمەن 150 مەتر بيىكتىكتە ورناتىلىپ، كەيىن 300 مەترگە دەيىن جوعارى كوتەرىلەدى.
ال رورلى دىڭگەك جەرگىلىكتى وندىرىستەگى بولاتتان جاسالعان.
