«نۇرلى ەرتىس» باعدارلاماسى: ەلوردالىق 35 وتباسى ەكىباستۇزعا قونىس اۋداردى
«نۇرلى ەرتىس» باعدارلاماسىنىڭ كەزەكتى كوشى ەكىباستۇزعا جول تارتتى. جۇمىسسىزدىق پەن باسپانا ماشاقاتىنان جالىعىپ، جاڭا تىرلىك باستاۋعا ۇمتىلعان جانۇيالاردى اڭگىمەگە تارتىپ كوردىك.
ءوزىن دينارا اياعانوۆا دەپ تانىستىرعان ءۇش بالانىڭ اناسى 18 جىل بويى پاتەر جالداپ كەلگەنىن ايتادى.
«وتباسىمدا وزىممەن قوسقاندا بەس ادام بار. «نۇرلى ەرتىس» باعدارلاماسىنا ىلىنگەنىمىزگە قۋانىشتىمىز. بۇل باعدارلامانىڭ كوپبالالى وتباسىلارمەن بىرگە 3 بالاسى بار بىزگە دە مۇمكىندىك بەرگەنىنە قۋانىشتىمىز. نۇر-سۇلتاندا 18 جىل پاتەر جالداپ كەلدىك. نەگىزى كەزىندە ەرەيمەنتاۋ جاقتان استاناعا جۇمىس ىزدەپ كوشكەن بولاتىنبىز. ەڭبەكاقىمىز كۇندەلىكتى شىعىنداردان اسپاعاندىقتان، ۇيگە اقشا جيناي المادىق»، - دەيدى ول.
دينارا بۇل باعدارلاما تۋرالى بىرگە جۇمىس ىستەگەن ارىپتەسىنەن ەستىگەن ەكەن.
«جۇمىستا بىرگە ىستەگەن جاينا دەگەن ارىپتەسىم بولدى. ءبىر اي بۇرىن ءتورت بالاسىمەن وسى باعدارلاما ارقىلى ەكىباستۇزعا كوشكەن. كوپبالالى ەمەس بولسا دا، پاتەر الۋعا بولاتىنىن سول ايتتى. قۇجات وتكىزىپ ەدىك، ماقۇلدادى. جولداسىم سوڭعى ساتكە دەيىن سەنبەدى. مەن وعان ءۇي بەرەتىن بولسا، ەشتەڭەگە قاراماي كەتەتىنىمدى ايتتىم. ويتكەنى، 18 جىل بويى پاتەر جالداپ ءومىر ءسۇرۋ وڭاي ەمەس. كۇيەۋىم قۇرىلىسشى، ءوزىمنىڭ ماماندىعىم زاڭگەر بولسا دا، اۋرۋحانادا جۇمىس ىستەيمىن. ول جاقتا بۇل ەكى ماماندىققا دا سۇرانىس بار ەكەن. جاڭا ۇيگە بارامىز، جاڭا ءومىر باستالادى دەگەن كوتەرىڭكى كوڭىل-كۇيمەن كەتىپ بارامىز»، - دەيدى ءۇش بالانىڭ اناسى.
ەرلى زايىپتىنىڭ ۇزاق ويلانىپ شىعارعان شەشىمىنە كەيبىر جاقىندارى قارسى بولعان كورىنەدى.
«كىرەتىن ءۇيىمىزدى تەك ينتەرنەتتەن كوردىك. كۇزگە دەيىن بالالاردى مەكتەپكە ورنالاستىرادى دەپ سەندىرىپ وتىر. ول جاقتان ەل كوشىپ جاتسا، سەندەر نەگە بارىپ جاتىرسىڭدار دەۋشىلەر دە بولدى. جاڭا ءۇي بەرسە، جۇمىس ۇسىنسا، نەگە بارماسقا دەپ ويلايمىن. سوندىقتان دا وسىنداي شەشىمگە كەلدىك»، - دەدى دينارا اياعانوۆا.
ال 6 بالانىڭ اكەسى ايداربەك مامەنوۆ بۇل شەشىمگە بالالاردىڭ قاتتى قۋانعانىن ايتادى.
«وزىمىزبەن بىرگە 10 سومكە جۇك الىپ بارامىز. ءبارى بالالاردىڭ كيىم-كەشەگى. ەرتەڭگە دەگەن سەنىممەن كوشىپ بارامىز دەۋگە بولادى. تۇرمەگە بارا جاتقان جوقپىز عوي. ءوزىمىزدىڭ ۇيىمىزگە بارا جاتىرمىز. بەس جىلدان كەيىن ول ءۇيدى جەكە باسىمىزعا اۋدارىپ الۋعا بولاتىنى ايتىلدى. بارعان سوڭ كوپپەن بىرگە كورەمىز. ەلدىڭ استاناسىن ەكىباستۇزعا ايىرباستادىق دەگەن وكىنىش جوق. باسپانا مەن جۇمىس بولسا، ول دا قازاق جەرى عوي. بارىنەن دە بالالار ءوز ءۇيىمىز بولادى دەپ قۋانىپ ءجۇر»، - دەيدى ايداربەك.
ونىڭ وتباسى تۇركىستان وبلىسىنان ەلورداعا 7 جىل بۇرىن قونىس اۋدارعان ەكەن.
«ەكىباستۇزدا ءۇي مەن جۇمىس بەرەمىز دەپ وتىر. ءوزىم كران جۇرگىزۋشىمىن. ازىرگە ايلىعىمىز قانشا بولاتىنىن، قانداي كاسىپورىنعا كىرەتىنىمىزدى ءالى ايتقان جوق. ايەلىم بالا كۇتىمى بويىنشا ۇيدە وتىر. ەڭ كىشى بالامىز بىرگە جاڭا تولدى. ۇلكەنىنىڭ جاسى وندا. تەگىن بالاباقشا ۇسىنىلىپ وتىر. مەكتەپ جاسىنداعىلارعا تەگىن فورما بەرەمىز دەگەن ۋادەلەرى بار. باعدارلاما وتە دۇرىس ويلاستىرىلعان. جەڭىلدىكتەرى كوپ بولعاندىقتان، ۇيرەنگەن ورتامىزدى تاستاپ، كوشىپ بارامىز. ايتپەسە وسى قالادا كەزەگىمىزدى كۇتىپ وتىرا بەرەر ەدىك»، - دەدى ول.
