الماتىدا 35 جاستاعى ايەل 10 بالانىڭ اناسى اتاندى - كەسكىن
پەرزەنتحانادان كۇنى ەرتەڭ شىعاتىن ۇشەمدى جىلى ۇيدە قارسى الۋعا اكە قاۋقارسىز.
بۇل تۋرالى الماتى تەلەارناسى حابارلايدى.
التىن قۇرساقتى كەلىنشەك وسىدان 2 اپتا بۇرىن ۇشەمدى تۋدى. بالالار قازىر قاراساي اۋداندىق ورتالىق اۋرۋحانانىڭ پەرزەنتحانا بولىمشەسىندە جاتىر. دارىگەرلەر اي-كۇنى جەتپەي تۋعان نارەستەلەردىڭ جاعدايى وڭالعاسىن، اۋرۋحانادان شىعارماقشى. الايدا، قىستىڭ كوزى قىراۋدا كوپ بالالى وتباسى قۇرقىلتايدىڭ ۇياسىنداي جالدامالى تامدى پانالاۋعا ءماجبۇر.
35 جاسىندا ون بالانى ومىرگە اكەلگەن باتىر انا ايگۇل ىسقاقوۆانىڭ قۋانىشىندا شەك جوق. كوپ بالالى انا بولۋدى ءاۋ باستان ارمانداعان كەلىنشەك ىسقاقوۆتار اۋلەتىنە بىردەن ۇشەم سىيلادى. بۇعان دەيىن 7 قۇرساق كوتەرىپ، كۇمىس القا تاعىپ ۇلگەرگەن انانىڭ سابيلەرىنىڭ اراسى 2 جىلدان. ۇلكەنى 13 كە تولىپتى. 7 بالادان كەيىن ومىرگە كەلگەن ۇشەمگە اتا- اناسى ايان، ايانا جانە رايانا دەگەن ەسىم بەرىپتى.
«جولداسىم ۇيىندە جالعىز ۇل، ءۇش قىز بولدى. ءبىراق، كوبىرەك بولسا ەكەن دەپ ايتتى، كوپ بولعان جاقسى عوي دەپ. سول ءۇشىن كوپبالالى بولعاندى قالادىق. ءۇش بالا بولعانىن بىلگەندە ءبىز جولداسىمىز ەكەۋمىز قورىقتىق كىشكەنە. ولاردى قالاي باعامىز، ولاردى قالاي جەتكىزەمىز دەگەن وي كەلدى. ءبىراق، قۇدايدىڭ بەرگەنى. ءوزىمىز ەندى دۇنيەگە الىپ كەلگەننەن كەيىن ارى قاراتاي باعۋ مىندەتىمىز»، - دەدى كوپ بالالى انا ايگۇل ىسقاقوۆا.
وسىدان ەكى اپتا بۇرىن دۇنيە ەسىگىن اشقان ۇشەمنىڭ ەكەۋىنىڭ جاعدايى قازىر قالىپتى. ياعني، ايان مەن ايانا اناسىنىڭ جانىندا پالاتادا. ال، كىشكەنتاي رايانا جان ساقتاۋ بولىمىندە ەم قابىلداپ جاتىر. دارىگەرلەر ول ءتيىستى سالماعىن جيناپ بىتكەسىن، ۇشەمدى ۇيلەرىنە جىبەرۋگە دايىن وتىر.
ۇشەمدەر اي-كۇنى جەتپەي تۋعان. رايانا قازىر جان ساقتاۋ بولىمىندە جاتىر. ونىڭ سالماعى تۋىلعاندا 1 كەلىدەن ءسال اسقان. قوس پەرزەنتىنىڭ جاعدايى جاقسى بولسا دا، كەنجەسىنە الاڭداعان اناسى راياناسىنىڭ جاعدايىنا قايمىعىپ ءبىر ساتتە الىستامايدى.
«بۇل بيىلعى جىلى ءبىزدىڭ پەرزەنتحانامىزداعى العاشقى ۇشەم. سابيلەردىڭ دەنساۋلىعىنا قاۋىپ تۋدىرماۋ ءۇشىن، كەسىر تىلىگى ارقىلى بوساندىردىق. ومىرگە ءبىرىنشى 2 كەلى 300 گراممەن ۇل بالا كەلدى. ال، ەكىنشى تۋعان قىزدىڭ سالماعى 1 كەلى 950 گرامم بولسا، كەنجەسىنىڭ سالماعى نەبارى 1 كەلى 550 گرامم. ازىرگە ۇشەمدى پەرزەنتحانادان قاشان شىعاراتىنىمىزدى ايتا المايمىز، بارلىعى ۋاقىتتىڭ ەنشىسىندە»، - دەدى «قاراساي اۋداندىق اۋرۋحاناسى» پەرزەنتحانا بولىمشەسىنىڭ مەڭگەرۋشىسى ەلميرا قاليبەكوۆا.
ۇشەمدەردىڭ پەرزەنتحانادان شىعۋىن ۇيدە اكەسى مەن 5 باۋىرى اسىعا كۇتۋدە. ال، تۇڭعىشتارىن اكە- شەشەسى مەكتەپكە ورنالاستىرا الماعاندىقتان، شالعايداعى اعايىنىنا ۋاقىتشا وقۋعا جىبەرىپتى. قالعان 5 بالا مەن ۇشەم ەندى اياداي بولمەدە ءومىر سۇرۋگە ءماجبۇر. ويتكەنى، وتباسىنىڭ جاعدايى ءماز ەمەس. ايىنا 20 مىڭ تەڭگە تولەپ، توزىعى جەتكەن قۇرقىلتايدىڭ ۇياسىنداي تامدى جالعا الىپ، ارەڭ كۇن كەشۋدە. وتاعاسىنىڭ سوزىنشە، بۇرىننان بەرى پاتەر كەزەگىندە تۇرعىنا ىسقاقوۆتار اۋلەتىنە الاتاۋ اۋدانىنىڭ اكىمدىگى 7 بالادان سوڭ-اق ءۇي بەرۋگە ۋادە ەتىپتى. الايدا، بۇل تەك ءسوز جۇزىندە قالعان كورىنەدى.
«2009 -جىلى شاڭىراقتاعى اكىمدىككە كىرگەنبىز. قالالىق اكىمدىكتەن دە قاعاز الىپ، كەزەكتە تۇرعانبىز. ول كەزدە تۇرىپ جاتقاندا ءۇش بالامىز بولاتىن. سودان مىنە جەتەۋ بولدى، ءالى مىنە- مىنە دەپ. اكىمدىكتەگىلەر ءسوز بەردى، بىلتىر جەتىنشىسىن بوسانعاندا، قاعاز الىپ كەل، جەتەۋ دەگەن انىقتاما الىپ كەل دەدى. سودان كەيىن بىلتىردان قالدىرمايمىز دەگەن»، - دەدى قايرات ىسقاقوۆ.
اۆتوبۋس جۇرگىزىپ، كۇندەلىكتى تاپقان- تايانعانىمەن بالا- شاعاسىن اسىراپ جۇرگەن وتاعاسى قازىر ءتىپتى جۇمىسسىز. پەرزەنتحانادان كۇنى ەرتەڭ شىعاتىن ۇشەمدى جىلى ۇيدە قارسى الۋعا اكە قاۋقارسىز. وتباسىنىڭ ءتىپتى كومىر تۇسىرۋگە تابىسى جوق. دەسە دە، جاس بولا تۇرا 10 بالانى ومىرگە اكەلگەن ىسقاقوۆتار اۋلەتى قيىندىقتان قايمىقپاي، بالا- شاعانى قاتاردان قالدىرماۋعا بارىن سالماق.
